QTJ-Júk tasymaly lokomotıvtiń relsten shyǵyp ketý faktilerin jasyryp kelgen

ORAL. QazAqparat - Batys Qazaqstan kólik prokýratýrasy 2020-2023 jyldar aralyǵynda magıstraldy temirjol jelisinde qozǵalys qaýipsizdigin buzýdyń (onyń ishinde lokomotıvtiń relsten shyǵyp ketýi) 4 jaǵdaıyn jasyrý faktisin anyqtady. Olar tıisti túrde tekserilmegen, dep habarlaıdy QazAqparat Bas kólik prokýratýrasyna silteme jasap.

Osy fakti boıynsha prokýratýra «QTJ-Júk tasymaly» JShS atyna zańbuzýshylyqtardy, olardy jasaýǵa yqpal etetin sebepter men jaǵdaılardy joıý, sondaı-aq kináli adamdardy jaýapqa tartý jóninde usynys engizgen.

Alaıda mundaı jaǵdaıdy túzetýdiń jáne oǵan jol bermeýdiń ornyna «QTJ-Júk tasymaly» JShS bas dırektorynyń m.a. M.K.Kókrekbaev «Prokýratýra týraly» Konstıtýtsııalyq zańnyń 36-babynyń talaptaryna sáıkes kelmeıtin hatpen jaýap bergen.

Atap aıtqanda, M. Kókrekbaev prokýrordyń usynýy boıynsha shara qabyldaǵan joq: lokomotıvtiń jıyny «oqıǵa» retinde saralanbaǵan, jyljymaly quramnyń arnaıy sıgnaldarynyń iske qosylýynyń 3 jaǵdaıy (temir jolǵa qulaý, jyljymaly quramnyń bólshekterin tartý) qozǵalys qaýipsizdigin buzý retinde esepke alynbaǵan jáne «oqıǵa» retinde saralanbaǵan.

Bul kólik prokýrorynyń ÁQBtK-niń 664-baby boıynsha is qozǵaýyna negiz boldy (prokýrordyń usynýy boıynsha shara qoldanbaý).

Nátıjesinde sot M.K.Kókrekbaevty joǵaryda atalǵan ákimshilik quqyq buzýshylyq jasaǵany úshin kináli dep tanyp, ákimshilik aıyppul saldy.

Sot sheshimi zańdy kúshine endi.