QTJ Wabtec kompanııasynyń tsıfrlyq júıelerin engizýde

ASTANA. QazAqparat - «Qazaqstan temir joly» UK» AQ-da tasymaldaý protsesiniń tıimdiligin arttyrýǵa jáne kompanııanyń júk tasymaly salasyndaǵy operatsııalyq qyzmetin jetildirýge baǵyttalǵan Tsıfrlandyrý aptalyǵy bastaldy, dep habarlaıdy QazAqparat.

Aptalyq aıasynda QTJ, «QTJ-Júk tasymaly» JShS jáne Wabtec kompanııasynyń qatysýshy qyzmetteri ókilderiniń kezdesýleri ótýde. Poıyzdar qozǵalysyn josparlaýdy avtomattandyrý, kesteler qurý jáne magıstraldyq jelidegi operatsııalardy ońtaılandyrý boıynsha tsıfrlyq sheshimder tanystyryldy.

«QTJ-Júk tasymaly» JShS temir jol tasymalynyń tıimdiligin arttyrý maqsatynda TE33A serııaly júk lokomotıvteriniń parkin «Reısti ońtaılandyrýshy» (Trip Optimizer) Wabtec tsıfrlyq júıesimen jabdyqtaıdy.

Trip Optimizer – kontroller men dınamıkalyq tejegishti avtomatty túrde retteý arqyly mashınıske lokomotıvti basqarýǵa kómektesetin aqyldy júıe. Júıe marshrýt pen júk týraly derekterdi taldaı otyryp, naqty ýaqyt rejıminde ońtaıly jyldamdyq rejımi men otyn shyǵynyn esepteıdi. «Trip Optimizer» Tsıfrlyq júıesin engizý» jobasy lokomotıv brıgadasynyń poıyzdy júrgizý sapasyn arttyrýǵa, daıyn poıyzdarǵa lokomotıvterdi qosýdy josparlaýǵa, zııandy zattardyń shyǵarylýyn azaıtýǵa baǵyttalǵan. Jobany iske asyrý nátıjeleri boıynsha sandyq jáne sapalyq paıdalaný kórsetkishterin jaqsartý, dızel otynyn únemdeý kútilýde.

«Aldaǵy onjyldyqta tsıfrlyq tehnologııalardyń kómegimen olardyń operatsııalyq tıimdiligin arttyrýdy jalǵastyra otyryp, ornyqty damý jáne ekologııalyq taza tehnologııalar salasyndaǵy jahandyq deńgeıde úlgi etý úshin QTJ-men yntymaqtasýdy josparlap otyrmyz», - dep atap ótti Wabtec korporatsııasynyń Reseı/TMD, Eýropa, Taıaý Shyǵys jáne Soltústik Afrıka boıynsha aǵa vıtse-prezıdenti Gohan Baıhan.

Aptalyq QTJ-nyń elordadaǵy obektilerine: Suryptaý stantsııasyna, lokomotıv deposyna jáne «Lokomotıv qurastyrý zaýyty» AQ-ǵa saparmen aıaqtalady.