QTJ tóraǵasy Saýat Myńbaev Arysta júr
«Qazaqstan temir joly UK» AQ-nyń tóraǵasy Arys temir jol stansasyndaǵy kólik ınfraqurylymy nysandaryn qalpyna keltirý jumystarynyń nátıjesimen tanysty. Shoıyn jol nysandarynda júrgizilgen barlyq jóndeý jumystary merziminde aıaqtalǵan. Jarylys saldarynan temir jol torabynda ornalasqan 60-tan astam qyzmettik-tehnıkalyq ǵımarattar, kóptegen turǵyn úıler zaqymdalǵan bolatyn. Qysqa ýaqyt ishinde kóne temirjol vokzaly tolyq qaıta jóndeýden ótip, jańa keıipke engen. Qala ómirindegi tarıhı da mańyzdy nysannyń kúrdeli qurylysyn «Samuryq-Qazyna» ulttyq ál-aýqat qory» júrgizdi.
Arys – Orta Azııa qaqpasy, toǵyz joldyń toraby atanǵan temirjolshylar qalasy. Halqynyń basym kópshiligi de shoıyn jol salasynda qyzmet etedi. Bıyl 1-temirjol vokzalyna 115 jyl tolyp otyr. Іrgetasy 1904 jyly qalanǵan kóne ǵımarattyń ishi-syrty tolyq jańǵyrtyldy. Eń bastysy, ǵımarattyń tarıhı sáýleti saqtalyp, urpaqqa kóne jádigerlerdiń biri bolyp qalmaq.