QTJ temirjol boıynan úsh kúnde 30 myń tonna qar tazalady

 ASTANA. QazAqparat - «Qazaqstan temir joly» ulttyq kompanııasy 20-23 qańtar kúnderi respýblıkalyq temirjoldardyń boıynan 30 myń tonna qar shyǵarǵan, dep habarlaıdy QazAqparat.

Kompanııanyń baspasóz qyzmetinen habarlaǵandaı, demalys kúnderi qar kóp túsip, temirjolshylar poıyzdardyń toqtap qalýyna jol bermeý úshin úzilissiz jumys istegen.

« 20-23 qańtar aralyǵynda, úsh táýlikte 12 myń shaqyrym temirjol boıy tazalanyp,  30 myń tonnadan astam qar shyǵaryldy. Qar tazalaý úshin temirjol sharýashylyǵy bóliminiń 7 myńnan asa qyzmetkeri  jumys istedi. Qar tazalaý jumystaryna  200-ge jýyq arnaıy tehnıka tartyldy»,-dep habarlady kompanııanyń baspasóz qyzmeti.

«QTJ» UK» AQ fılıaly, Magıstraldy jeli dırektsııasynyń atqarýshy dırektory Baýyrjan Ýálıdiń aıtýynsha, 7 myńnan asa qyzmetkerler men qar tazalaý tehnıkalarynyń  teń jartysy  Aqmola men Aqtóbe magıstraldyq jelisinde jumys istegen.