QTJ shtattaǵy qyzmetkerlerdiń sanyn jáne jalaqy deńgeıin tómendetpeıdi

ASTANA. QazAqparat - «Qazaqstan temirjoly» UK» AQ shyǵyndardy azaıtý barysynda shtattaǵy qyzmetkerlerdiń sanyn jáne jalaqy deńgeıin tómendetpeıdi. Bul týraly búgin Ortalyq kommýnıkatsııalar qyzmetinde ótken brıfıngte kompanııanyń korporatıvti damý boıynsha atqarýshy dırektory Erkin Jýsanbaev málim etti.

«Qazaqstandyq eksporttaýshylardyń damý qarqynynyń álsireýine baılanysty oryn alyp otyrǵan daǵdarystyń áseri bizdiń óndiristik kórsetkishterimizge de yqpal etetini ras. Soǵan baılanysty ishki josparlarymyz da qaıta qaralady, sonyń ishinde eńbek qatynastary da bar. Jalpy birqatar sharalar qolǵa alynady, biraq olardyń qyzmetkerlerdiń sanyn qysqartýǵa nemese olardyń jalaqylaryn tómendetýge esh qatysy joq», - dep atap ótti ol.