QTJ sheneýnikteriniń para somasy aıyna birneshe mlrd teńgege jetedi

ASTANA. QazAqparat – «Qazaqstan temir joly» Ulttyq kompanııasynyń jemqorlyq táýekelderine baılanysty tergeý bastaldy. Bul týraly QR Sybaılas jemqorlyqqa qarsy is-qımyl agenttigi Preventsııa qyzmetiniń basshysy Saıan Ahmetjanov málim etti, dep habarlaıdy QazAqparat tilshisi.

«Qazaqstan temir joly» kompanııasy menedjmentimen birge jemqorlyq táýekelderine júıeli saraptama júrgizildi. Bul sala óte mańyzdy ári sońǵy 5 jylda osy salada 139 qylmystyq is tirkelgen. QTJ, sarapshylyq qoǵamdastyq ókilderiniń qatysýymen júrgizilgen júıeli sarapatama nátıjesinde jemqorlyq táýekelder anyqtaldy. Qazirgi ýaqytta saraptama nátıjesi olardy joıý jónindegi usynym retinde qalyptastyryp jatyr», - dedi Saıan Ahmetjanov Ortalyq kommýnıkatsııalar qyzmetindegi baspasóz máslıhaty barysynda.

Onyń aıtýynsha, júkterdi tasymaldaý barysyndaǵy jemqorlyq syzba anyqtalǵan. Qazaqstan temir joly kompanııasy sheneýnikteri avtomattandyrýdyń joqtyǵyn jáne quqyqtyq aktilerdiń jetildirilmegendigin paıdalanyp, ákimshilik kedergilerdi qoldan jasaıdy. Sol arqyly bızneske vagon alý úshin para berýge májbúrleıdi.

Saıan Ahmetjanovtyń atap ótýinshe, elimizde aıyna ortasha eseppen QTJ 400 myń júk tıelgen vagon qyzmetin úsynady. Al bul oraıda zańsyz syıaqy mólsheri aıyna birneshe mlrd teńgege jetýi múmkin. Anyqtalǵan faktiler boıynsha aldyn ala tergeý amaldary júrgizilip jatyr.

Sonymen qatar Sybaılas jemqorlyqqa qarsy is-qımyl agenttigi bul problemany QTJ basshylyǵymen, bıznes qoǵamdastyqpen talqylaǵan.