QTJ poıyz apatynan qaza tapqan jasóspirimniń týystaryna kóńil aıtty

ASTANA. QazAqparat  - Jambyl oblysynyń aýmaǵynda relsten shyǵyp ketken «Astana-Almaty» poıyzynyń barlyq jolaýshysy Shý stansasyna jetkizildi, dep habarlaıdy QazAqparat tilshisi «Qazaqstan temir joly» UK» AQ baspasóz qyzmetine silteme jasap.

«Poıyzda 829 jolaýshy bolǵan. Oqıǵa saldarynan bir adam qaza taýyp, jaraqat alǵan úsh jolaýshy aýrýhanaǵa jetkizildi. Poıyzdyń barlyq jolaýshysy Shý stansasy jetkizilip, olarǵa qajetti medıtsınalyq kómek kórsetilip, psıhologııalyq qoldaý jasaldy. Ystyq tamaqpen qamtamasyz etildi. Jolaýshylardy dittegen jerlerine jóneltý jumystary júrgizilip jatyr. «Qazaqstan temir joly» UK» AQ qaza tapqan azamattyń týǵan-týystary men jaqyndaryna kóńil aıtyp, zardap shekkenderge tezirek saýyǵyp ketýlerin tileıdi», - delingen kompanııa aqparatynda.

Kompanııa málimetinshe, elimizdiń qoldanystaǵy zańnamasyna sáıkes zardap shekken barlyq jolaýshyǵa qajetti kómek kórsetiletin bolady. Apat saldaryn joıýǵa Shý men Saryshaǵan stansasynyń qalpyna keltirý poıyzdary jumyldyrylǵan. QR IDM Kólik komıteti janynan qurylǵan arnaıy komıssııa tekserý qorytyndysy boıynsha poıyzdyń relsten shyǵý sebebin jarııalaıtyn bolady.