QTJ-nyń laýazymdy tulǵalary para alý kúdigine ilikti

NUR-SULTAN. QazAqparat - «Qazaqstan temir joly» ulttyq kompanııasynyń laýazymdy tulǵalary para alý kúdigine ilikti. Bul týraly búgin QR Memlekettik qyzmet isteri jáne sybaılas jemqorlyqqa qarsy is-qımyl agenttigi Qoǵammen baılanys departamentiniń dırektory Arman Berdalın aıtty, dep habarlaıdy QazAqparat tilshisi.

«Sybaılas jemqorlyqqa qarsy is-qımyl ulttyq bıýrosy «Qazaqstan temir joly» ulttyq kompanııasy» aktsıonerlik qoǵamynyń «Temirjol kóligi personalyn baǵalaý jáne damytý ortalyǵynyń» dırektoryna qatysty sotqa deıingi tergeý júrgizip jatyr. Ol ózine baǵynyshty Aqtóbe, Pavlodar, Taraz jáne Qaraǵandy ortalyq fılıaldary dırektorlarynyń 1,7 mln teńge aqshasyn qaıtarymsyz negizde ıelenip, olarǵa atalǵan somada materıaldyq zalal keltirý arqyly ókilettigin teris paıdalaný kúdigine ilindi», - dedi Arman Berdalın.

Onyń aıtýynsha, kúdikti kinásin tolyq moıyndady. Soǵan baılanysty ony protsestik ustaý qoldanylǵan joq. Sotqa deıingi tergeý jedeldetilgen tártippen aıaqtaldy.

«Sondaı-aq Sybaılas jemqorlyqqa qarsy is-qımyl ulttyq bıýrosynyń Qaraǵandy oblystyq departamenti «Qazaqstan temir joly» ulttyq kompanııasy» aktsıonerlik qoǵamynyń Qaraǵandy kólik oqý ortalyǵy dırektoryna qatysty sotqa deıingi tergeý júrgizip jatyr. Ol deldal arqyly dáris alýshydan sabaqqa qatysýdan bosatý úshin 30 myń teńge somasynda para aldy dep kúdikke ilindi. Kinásin tolyq moıyndaýyna baılanysty protsestik ustaý qoldanylǵan joq. Tergeý jalǵasýda», - dedi ol.

Jalpy onyń dereginshe, aǵymdaǵy jyldyń basynan Sybaılas jemqorlyqqa qarsy qyzmet «Qazaqstan temir joly» ulttyq kompanııasy» aktsıonerlik qoǵamy jáne onyń baǵynyshty uıymdarynyń jumysshylaryna qatysty 29 sybaılas jemqorlyq qylmysy tirkegen. Kúdikti retinde 14 tulǵa jaýapqa tartylyp jatyr.