«QTJ» men «Lıanıýngan porty» Aqtaý porty bazasynda konteınerlik hab salmaqshy

<p>ASTANA. KAZINFORM &mdash; 2 shildedegi Qazaqstan-Qytaı Іskerlik keńesi sheńberinde &laquo;QTJ&raquo; men qytaılyq kompanııalar arasynda birqatar qujattarǵa qol qoıyldy. Sonyń ishinde &laquo;QTJ&raquo; men &laquo;Lıanıýngan porty&raquo; Aqtaý porty bazasynda konteınerlik hab salýǵa ınvestıtsııalar týraly kelisken bolatyn.</p>

Birlesken joba konteınerlik júkterdi óńdeý jáne tıep jóneltý boıynsha qyzmetter keshenin kórsetý úshin Aqtaý portyndaǵy qoldanystaǵy ınfraqurylymnyń tıimdiligin arttyrýǵa múmkindik beredi.

Sondaı-aq «KTZ Express», reseılik «Slavtrans-Servıs» jáne qytaılyq Xi'an Free Trade Port arasynda konteınerlik tasymaldar boıynsha kelisim jasalǵan. Bul logıstıkany edáýir jedeldetýge, elektrondyq saýdany damytýǵa, kedendik rásimderdi jeńildetip, saýda kedergilerin azaıtýǵa jol ashady.

Osy kezde «QTJ» men CRRC kelisimi sheńberinde alǵashqy manevrlik lokomotıvter Altynkól stantsııasyna tolyq jetkizilgeni jarııalandy. Kelisim sheńberinde 100 manevrlik jáne 100 magıstraldyq lokomotıv jetkizilip, Qazaqstanda jyljymaly quramǵa qyzmet kórsetý servıstik ortalyqtaryn ashý jáne ınjınırıngtik ortalyq qurý josparlanǵan. Manevrlik teplovozdar Qazaqstannyń klımattyq jaǵdaılaryn eskere otyryp jasalǵan, –40°C-tan +50°C-qa deıingi temperatýrada jumys isteı alady, salmaǵy 135 tonna. Ári dızel-generator qondyrǵysy QR-da qabyldanǵan ekologııalyq standarttarǵa sáıkes keledi.

Foto: QTJ

Al gıbrıdti lokomotıv óndirisi 2025 jyly qolǵa alynbaq. Jobadan kúter úmit kóp, sebebi CRRC Corporation Limited álemdegi eń iri temirjol kóligin óndirýshi, álemdegi lokomotıv óndirisi naryǵynyń shamamen 50 paıyzyna ıelik etedi.