QTJ Qytaıdyń 17 provıntsııasymen yntymaqtasady

ASTANA. QazAqparat - Astanada «Qazaqstan temir joly» UK» AQ men Qazaqstan ulttyq ekspedıtorlar qaýymdastyǵy (QUEQ) «Jasampazdyqqa 20 jyl. Kúsh birlikte» mereıtoıyna arnalǵan halyqaralyq konferentsııa ótti, dep habarlaıdy «QazAqparat» HAA tilshisi.

Konferentsııa barysynda «QTJ» ulttyq kompanııasynyń prezıdenti Qanat Alpysbaev óz baıandamasynda tranzıttik-kólik áleýetin iske asyrý jáne Qazaqstannyń halyqaralyq ekonomıkalyq baılanystaryn keńeıtý qajettigin atap ótti.

«Búgingi tańda Qazaqstanda zamanaýı jolaýshylar vagondary shyǵarylyp jatyr: teplovozdar, elektrovozdar, relster, jol salýǵa arnalǵan materıaldar jáne sáıkes tolymdaýshylar. Qazaqstandyq zaýyttardyń ónimderi joǵary eksporttyq áleýetke ıe», - dep habarlady ol.

«Búgingi tańda kompanııa Qytaıdyń 17 provıntsııasymen, Vetnam, Koreıa, Eýropa jáne Parsy shyǵanaǵy elderimen tikeleı jumys istep jatyr. Biz turaqty konteınerlik qyzmetti jáne básekege qabiletti merzimdi jetildiremiz. Nátıjesinde 2011 jyly Qytaı-Eýropa-Qytaı qurlyqtyq baǵytyndaǵy Qazaqstannyń úlesi 70%-ke jetti. Sonymen qatar, bizdiń el arqyly Qytaı-Túrkııa-Iran baǵytynyń jańa marshrýttary ıgerilip jatyr», - dedi Qanat Alpysbaev.

Sondaı-aq, ol Memleket basshysynyń QTJ-ǵa 2020 jylǵa deıin 2 mln. konteınerge tranzıttik tasymal kólemin ulǵaıtýdy tapsyrǵanyn atap ótti.