QTJ qazaqstandyq kemeniń Ýkraına astyǵyn tasymaldaýyna túsinik berdi

NUR-SULTAN. QazAqparat - «Qazaqstan temir joly» ulttyq kompanııasy qazaqstandyq «Jibek joly» kemesimen Ýkraınadan astyq eksporttalyp jatqanyna qatysty pikir bildirdi, dep habarlaıdy QazAqparat.

Keshe birqatar basylymda qazaqstandyq «Jibek joly» kemesimen Berdıansk teńiz saýda porty arqyly Ýkraınadan astyq eksporttalatyny týraly aqparat jarııalandy.

«KTZ Express» AQ 2021 jylǵy 26 qazanda «KTZ Express Shipping» JShS reseılik Green Line LLC kompanııasymen berboýt-charter shartyn jasasqanyn túsindiredi.

Onyń ishinde mynadaı sharttar bar:

- dedveıti 7000 tonna «Jibek joly» kemesi úshinshi tulǵalarǵa berý quqyǵynsyz berildi (2016 jyly Nevskıı keme jasaý jáne jóndeý zaýytynan satyp alyndy);

- 2022 jyldyń 30 qarashasyna deıin jaramdy;

- halyqaralyq tájirıbege sáıkes sanktsııalyq tarmaq bar: «Green Line» jaýapkershiligi shekteýli seriktestigi kelisim-shart jasasqan kúni jáne áreket etý merzimi ishinde olarǵa eshqandaı sanktsııalar qoldanylmaıtynyna kepildik beredi.

Áıtpese, keme ıesi kelisimshartty dereý buzýǵa quqyly.

Aıta keteıik, «Green-Line» JShS jáne onyń basshylyǵy (Shepın A.V., Tıhomırova M.V.) AQSh, EO, Ulybrıtanııa jáne Kanadanyń sanktsııalyq tizimine enbegen.

Tájirıbege jáne jasalǵan sharttarǵa sáıkes jalǵa alýshy júktiń túri men ony tasymaldaý baǵyttary boıynsha keme ıesimen kelispeıdi.

«Green-Line» jaýapkershiligi shekteýli seriktestigi 1999 jyldan beri astyq jáne munaı treıderi retindegi estonııalyq Mangelbert OU kompanııasymen Ýkraınadan Túrkııaǵa astyq tasymaldaý qyzmetin kórsetýge uzaqmerzimdi kelisimshartqa otyrdy.

Mangelbert OU basshysynyń aıtýynsha, 2022 jyldyń 28 maýsymynda «Jibek joly» kemesi Berdıansk teńiz saýda portynda (6 927,8 tonna) bıdaı tıep, porttan Túrkııanyń Qarasý porty baǵytynda shyqty (boljaldy ýaqyt boıynsha kemeniń kelýi - 1 shilde).

Sonymen qatar astyqtyń ýkraındyq ekeni, al tasymaldaý ýkraınalyq taraptyń ótinishi boıynsha kelisilgen gýmanıtarlyq dáliz boıynsha júzege asyrylatynyna senimdi.

Bul rette «KTZ Express» AQ osy tasymaldaýǵa qatysýshylarmen, sonymen birge dıplomatııalyq mıssııa ókilderimen belsendi konsýltatsııalar júrgizedi.

«KTZ Express» AQ qoldanystaǵy sanktsııalyq shekteýlerdi qatań saqtaýǵa mindetti ekenin jete túsinedi.