QTJ-da qyzmetkerlerdi qysqartýdyń balamasy retinde qysqartylǵan jumys kúni rejımin engizý usynylyp otyr

ASTANA. QazAqparat - «QTJ UK» AQ men «Qazaqstan temirjol, avtomobıl, áýe jáne sý kóligi qyzmetkerleriniń salalyq kásipodaǵy» QB-niń basshylyǵy 1 qyrkúıekten bastap qysqartylǵan jumys kúni rejımin engizý máselesin qarastyryp otyr.

Bul barlyq jumys oryndaryn saqtap qalýǵa baǵyttalǵan eń ońtaıly amal retinde qarastyrylýda.

«Birinshi jartyjyldyqta negizgi eksporttyq taýarlardyń baǵalyq konıýktýrasynyń nasharlaýymen baılanysty júk aınalymynyń azaıýy, aımaqtaǵy ekonomıka ósimi qarqynynyń baıaýlaýy, eksport kólemderiniń 22,4 paıyzǵa tómendeýine baılanysty kompanııa birqatar daǵdarysqa qarsy sharalardy qoldanyp otyr. Shyǵyndar bıýdjeti ońtaılandyryldy, materıaldar, otyn-energetıkalyq resýrstardy satyp alý, jóndeý jumystary men servıstik qyzmet kórsetý, jalpy jáne ákimshilik shyǵyndar azaıtylǵan», - delingen habarlamada.

Sonymen birge usynylyp otyrǵan sharalar kompanııanyń áleýmettik saıasatyna áser etpeıdi: aǵymdaǵy jyldaǵy áleýmettik tólemderdiń bıýdjeti 2014 jyldyń deńgeıinde qalǵan. Jumyskerlerge medıtsınalyq saqtandyrý, materıaldyq kómek kórsetý, temirjol kóligimen júrý jáne t.b. boıynsha jeńildikter usynylýda.

«QTJ UK» AQ-nyń jol bólimderi, qurylymdyq bólimsheler, fılıaldary men enshiles uıymdarynyń basshylaryna ujymdarda qyzmetkerler sanyn qysqartýǵa balama retinde tolyq emes jumys kúni rejımin engizý máselesin talqylap, óndiristik protsestiń toqtamaýyn qamtamasyz etý tapsyrylǵan.