QSZI segiz ókildikten turatyn óńirlik jelisin tanystyrdy
Alǵash ret QR Prezıdenti janyndaǵy QSZI elimizdiń óńirlerinde – Soltústik Qazaqstan, Qostanaı, Shyǵys Qazaqstan, Pavlodar, Mańǵystaý, Aqmola jáne Abaı oblystarynda segiz ókildik ashty. Sondaı-aq, bıl óńirlik jelini damytý aıasynda QSZI-da jańa Óńirlermen jumys bólimi quryldy.
Іs-sharaǵa Qazaqstan Respýblıkasy Parlamenti Senaty men Májilisiniń depýtattary, akademııalyq jáne sarapshylar qoǵamdastyǵynyń ókilderi qatysty.
Óziniń alǵysózinde QSZI dırektory Erkin Tuqymov QSZI óńirlik jelisi aımaqtardyń analıtıkalyq áleýetin nyǵaıtýǵa baǵyttalǵan mańyzdy bastama ekenin atap ótti.
E.Tuqymovtyń aıtýynsha, óńirlik jelini damytý óńiraralyq úılestirýdi jaqsartady, óńirlerdegi ókili arqyly jedel jáne senimdi málimetterdi «birinshi qoldan» alýǵa, óńirler boıynsha eldiń áleýmettik-ekonomıkalyq damý serpinin baqylaýǵa jáne túptep kelgende, QSZI daıyndaǵan taldamalyq jáne áleýmettanýlyq ónimderdiń sapasyn jaqsartýǵa múmkindik beredi.
«Memleket basshysy Q.K. Toqaevtyń aıtýynsha, memlekettik saıasattyń negizgi basymdyqtarynyń biri – óńirlerdi jan-jaqty damytý. «Qýatty óńirler – qýatty el» – bul jaı ǵana ádemi sózder emes, elimizdi jańǵyrtýdyń aıqyndaýshy formýlasy. Osy oraıda óńirlik zertteýlerdi sapaly ári jan-jaqty júrgizý asa mańyzdy. Ekonomıkalyq jáne áleýmettik saladaǵy naqty kórinisti «óńirden» kóretin bolsaq, biz sapaly taldaýlar daıyndap, óńirlerdi qoldaý men damytý boıynsha keshendi usynystar ázirleı alamyz», - dedi Erkin Tuqymov.
Shara aıasynda aımaq ókilderiniń taldamalyq jáne zertteýshilik daǵdylaryn damytýǵa baǵyttalǵan trenıngten ótti. QSZI sarapshylary aımaqtyq áriptesterine sandyq jáne sapalyq zertteý ádisteri, analıtıkalyq qujattardyń túrleri jáne olardyń qurylymy týraly aıtyp berdi. Trenıng qatysýshylaryna ǵylymı zertteýlerdi josparlaý boıynsha praktıkalyq keńester berildi. Sondaı-aq, aqparattyq qaýipsizdik taqyryby da talqylandy.