KSRO tólqujatymen júrgen atyraýlyq 58 jasynda jeke kýáligin aldy
Oblystyq polıtsııa departamenti baspasóz qyzmetiniń málimetine súıensek, KSRO tólqujatyn aýystyrmaǵan 58 jastaǵy Tóremurat Qamıev Inder aýdanynda turady. Onyń eski tólqujatpen júrgenine 29 jyl bolǵan.
«Er adamnyń jeke basyn kýálandyratyn tólqujatyn 1993 jyldan beri aýystyrmaı, Keńestik Sotsıalıstik Respýblıkalar Odaǵy kezinde berilgen eski úlgidegi tólqujatpen júrgeni anyqtaldy. Sol sebepten, 58 jastaǵy turǵyn Inder aýdandyq polıtsııa bólimi kóshi-qon qyzmeti tobynyń qyzmetkerlerine júginip, jeke kýáligin jańartý jóninde ótinish jasaǵan. Atalǵan azamattyń ótinishi boıynsha kóshi-qon qyzmeti tobynyń qyzmetkerleri onyń Qazaqstan Respýblıkasynyń azamattyǵyna qatystylyǵyn anyqtaýdy júrgizip, jańadan jeke basyn kýálandyratyn qujattyn daıyndap berdi. Turǵynnyń aıtýynsha, onyń osynsha ýaqyt aralyǵynda qujatyn jańartpaýyna otbasylyq jaǵdaıy sebep bolǵan», - dep habarlady departamenttiń baspasóz qyzmeti.
Qazaqstan Respýblıkasynyń jańa úlgidegi jeke kýáligin alǵan azamat kóshi-qon qyzmeti toby qyzmetkerleriniń qysqa merzimde ashyqtyq pen yńǵaıly qyzmet kórsetý qaǵıdasyn nazarǵa alyp, memlekettik qyzmet kórsetýdi uıymdastyrǵanyna alǵysyn bildirdi.
Eske sala ketelik, buǵan deıin HQKO-da tólqujat pen jeke kýálikti yńǵaıly ári jyldam jolmen qalaı alýǵa bolatyny jazylǵan edi.
Sondaı-aq, HQKO-larda qujattandyrý qyzmetterin alý kezinde Salyq kodeksine sáıkes, klıentterdiń belgili bir sanaty memlekettik baj tóleýden bosatylatynyn bile júrińiz.
Al, Aqmola oblysyndaǵy Halyqqa qyzmet kórsetý ortalyqtarynda múmkindigi shekteýli adamdarǵa tólqujat alǵany úshin memlekettik bajdar negizsiz salynǵan.