Ksell-ge ákimshilik is qozǵaldy

ASTANA. QazAqparat - Qazaqstannyń monopolııaǵa qarsy organy «Ksell» AQ-nyń ústem jaǵdaıdy teris paıdalanýyna qatysty tergep-tekserýdi aıaqtady. Mundaı aqparat QR Ulttyq ekonomıka mınıstrliginiń Feısbýktegi resmı paraqshasynda jarııalandy, dep habarlaıdy QazAqparat tilshisi.

Vedomstvo málimetinshe, tutynýshy shaǵymynyń máni «Ksell» AQ-nyń «Alǵa-1» tarıftik jospary boıynsha ınternetke qol jetkizý lımıti asyp túskennen keıin 30 myń teńgeden astam  somany esepten shyǵarǵany jáne ınternetke qol jetkizý úshin 1 Mb úshin 20 teńgelik tarıf boıynsha tólemaqy alǵany sebep bolǵan. Buǵan qosa, uıaly baılanys operatory bul jaıynda tutynýshyǵa habarlamaǵan.

Tergep-tekserý qorytyndysy boıynsha «Ksell» AQ-nyń áreketterinde kcell taýar belgisi boıynsha uıaly ınternetke qol jetkizý qyzmetterin kórsetý kezinde abonentterdiń zańdy quqyqtaryna qysym jasaıtyn tarıftik josparlar shartyn belgileýden týyndaıtyn ústem jaǵdaıdy teris paıdalaný faktileri anyqtaldy. Nátıjesinde  «Ksell» AQ-ǵa qatysty ákimshilik is qozǵalyp, materıal sotqa qaraý úshin jiberildi.

«Ústem jaǵdaıdy teris paıdalanǵany úshin tergep-tekserý nysanyna monopolıstik qyzmetti júzege asyrý nátıjesinde alynǵan kiristiń 5 paıyzy mólsherinde aıyppul salynady. Munan bólek, «Ksell» AQ-ǵa Kásipkerlik kodekstiń normalaryn buzýshylyqty toqtatý jáne tutynýshylarǵa qarajatty qaıtarýdy qosa alǵanda, olardyń saldarlaryn joıý týraly nusqama shyǵaryldy», - dep atap ótedi mınıstrlik.