Krıs Barton Astanada áıgili «Shazam» kompanııasyn qalaı qurǵanyn aıtyp berdi
«Bizdiń ýaqytty qýyp jetkenimiz sonshalyq, jumys bastaǵan 1999-2000 jyldar - aıpodtardyń ýaqyty bolatyn. Tsıfrlyq mýzykanyń álemi ol kezde joq edi. Adamdar mp-3-di áli júktemeıtin. Tsıfrlyq mýzykaǵa kelgende álem ol kezde artta qalǵan kúıde edi. Mine, «Shazam» kompanııasy úshin bul taptyrmas ýaqyt boldy», - deıdi Krıs Barton.
Onyń aıtýynsha, «Shazam» aıfondardyń ómirge kelýinen 7 jyl buryn jaryqqa shyqqan.
««Shazam» arqyly biz mýzykalardy pleı-paraqshalarǵa júkteýdi arman ettik. Adamdar buryn qolyndaǵy uıaly telefonyn qońyraý shalýdan basqa eshteńege qoldana almaıtyn. Biz «Shazam» jobasyn qurar kezde adamdar Nokıo-3310 telefonyn ustap júretin. Alaıda biz mynadaı júıe oılap taptyq: siz ózińizdiń qarapaıym (máselen, Nokıo-3310 - avt.) uıaly telefonyńyzben sóılesip turyp, tutqany sóılesip turǵan adamǵa estirte mýzykaǵa jaqyndatasyz. Biz bolsaq, ol mýzykanyń 15-20 sekýndtyq fragmentin qaǵyp alyp, odan keıin tutqany qoıyp, kóp ótpeı sizdiń telefonyńyzǵa mýzykanyń ataýyn SMS arqyly jiberip otyrdyq. Mine, Shazam osylaı órkendedi. Áý basta bul qyzmetti Ulybrıtanııada bastadyq», - dedi Krıs Barton.
Arada kóp ótpeı androıdtar shyǵa bastaǵanda «Shazam» olar úshin taptyrmas quralǵa aınalǵan.
«Qazirgi tańda androıdar men mobıldik qosymshalar bar kezde Shazam-dy adamdar mıllıardtap júktep alyp jatyr. Áıgili kompozıtorlar Shazam-men seriktesýde. Apple-men sóıleskenimde Shazam álemde eń kóp júktelgen qosymshalar qatarynda ekenin bildim. Sol kezde kezinde maǵan bul joba júzege aspaıdy degen adammen kezdesip qalyp, ekeýimiz birshama kúlip aldyq», - deıdi Krıs Barton.
Aıta ketsek, Shazam - bul tegin krossplatformaly joba. Kompanııanyń ataýy da - Shazam. Onyń maqsaty - dál qazirgi ýaqytta qandaı mýzykanyń oınap turǵanyn anyqtap berý bolyp tabylady. Ol buryn tek kommertsııalyq joba bolsa, qazirgi ýaqytta Mac OS, Windows 8, Windows RT úshin arnaıy qosymshasy jaryqqa shyqqan. Kompanııanyń shtab-páteri Londonda ornalasqan. Qazirgi ýaqytta ol 11 000 000 trekke qatysty málimet bere alady.
Foto: medium.com