Krıptovalıýta almaq bolǵan Qosshy turǵyny 2,7 mln teńgesinen aıyryldy

<p>KÓKShETAÝ. KAZINFORM - Krıptovalıýta arqyly aqshasyn eselemekshi bolǵan Aqmola oblysy Qosshy qalasynyń turǵyny alaıaqtardyń arbaýyna túsip, 2,7 mln teńge aqshasynan aıyryldy.</p>

Aqmola oblysy PD baspasóz qyzmetiniń málimetinshe, zardap shekken áıel bıylǵy jyldyń qańtar aıynda Instagram jelisinen kapıtaldy kóbeıtý týraly jarnamany kórip, qyzyǵýshylyq tanytqan. Jarnama avtorlary krıptovalıýtaǵa ınvestıtsııa salǵany úshin qarajatyn eki ese kóbeıtýge ýáde bergen.

«Silteme boıynsha ótip, saıtqa tirkelgennen keıin áıel jeke paraqsha men esepshot ashqan, onda 50 AQSh dollary bolǵan. Osylaısha, alaıaqtardyń arbaýyna túsken áıel 2 700 000 teńge aqshasyn aldyn ala ashqan esep shotqa aýdaryp jibergen. Qazirgi ýaqytta polıtsııa isti tergep jatyr», - dedi vedomstvodan.

Aıta ketsek, 19 aqpanda óńirde «Anti-fraud» respýblıkalyq jedel aldyn alý sharasy ótip jatyr.

Aktsııa aqparattyq tehnologııalar salasyndaǵy qylmystardy anyqtaý, jolyn kesý jáne ashýǵa baǵyttalǵan.

Eske salaıyq, kókshetaýlyqtyń 12 mln teńge aqshasyn jymqyrǵan dropper 3,5 jylǵa sottaldy.