Kreşenıe merekesi: Sýǵa túskende qandaı erejelerdi saqtaý qajet

ASTANA. QazAqparat – Elordanyń Tótenshe jaǵdaılar departamenti Kreşenıe merekesine oraı sýǵa túsý rásimi kezinde saqtyq erejelerin taǵy bir eske saldy, dep habarlaıdy QazAqparat tilshisi.

«Jyl saıyn 19 qańtarda elorda turǵyndary men qonaqtary «Kreşenıe Gospodnıa» pravoslavıelik merekesin atap ótedi. Onyń barysynda muzoıyqtarda jappaı shomylý uıymdastyrylady. Atalǵan mereke jappaı sıpatqa ıe bolǵandyqtan, sýǵa shomylýǵa keletinderdiń sany artatyny sózsiz. Osy oraıda, atalǵan rásimge qatysýǵa bel býǵan árbir adam saqtyq sharalaryn saqtap, tek begilengen oryndarda ǵana shomylýy qajet»,– dedi Astana qalasy TJD Azamattyq qorǵanys basqarmasy bastyǵynyń mindetin atqarýshy Azamat Qusaıynov elordanyń kommýnıkatsııalar qyzmeti alańynda ótken brıfıngide.

Shomylý oryndary arnaıy jabdyqtalǵan jáne onda kúzet bar.

«Tótenshe jaǵdaılardyń aldyn alý maqsatynda mamandar kómegi usynylady. Qala boıynsha eki arnaıy oryn bar, ol «Grand Alataý» turǵyn úı kesheni mańy jáne ekinshisi «Astanalyq» saıabaqtyń jaǵalaýynda. Arnaıy daıyndalǵan shomylý oryndary aǵash jáne temir torlarmen jabdyqtalyp, qaýipsizdik sharasy barynsha saqtalǵan. Muzoıyqqa kirerde, tereń tynys alyp, demdi ustaǵan kúıde sýǵa kirgen durys. Shomylyp shyqqan adamdy bireý oramal jáne halatpen kútip turǵany abzal. Muzoıyqqa túserde rezeńke aıaq kıim kııýdi umytpaý kerek» - deıdi ol.

Eske salaıyq, Astanada 18-19 qańtar kúnderi barlyq pravoslavıe shirkeýlerinde Kreşenıe merekesine oraı rásimder ótetinin jazǵan edik.