Kredıt portfeli dınamıkasyn tejeıtin faktorlar ataldy
«Ekonomıkany kredıtteýdi odan ári yntalandyrý týraly máselede ekonomıkany kredıtteý bankterdiń iskerlik belsendiligine jáne qaryz alýshylardyń tólem qabilettiligi boıynsha olardyń kútýlerin eskere otyryp, kredıt berýge daıyndyǵyna baılanysty ekenin nazarda ustaý qajet. Osylaısha, zańdy tulǵalardyń kredıt portfeliniń dınamıkasyn kredıt boıynsha usynystyń bolmaýy emes, kredıt tóleýge qabiletti suranystyń jetispeýi tejeıdi», - dedi ol Májilis depýattarynyń saýalyna bergen jaýabynda.
Onyń dereginshe, bazalyq mólsherlemeniń aǵymdaǵy deńgeıi 6-18 aı aralyǵynda ınflıatsııanyń jáne ınflıatsııalyq kútýlerdiń baıaýlaýyna baǵyttalyp, teńgedegi aktıvterdi qorǵaýǵa yqpal etedi. Bul rette aǵymdaǵy jaǵdaılarda bazalyq mólsherlemeniń tómendeýi uzaq merzimdi perspektıvada kredıtteý úshin aıtarlyqtaı teris saldarlarǵa ákelýi múmkin.
«Aqsha naryǵyndaǵy teńgedegi aktıvter kiristiliginiń tómendeýi naryqqa qatysýshylardyń valıýtalyq tańdaýlarynyń ózgerýine jáne salymdardyń dollarlanýyn ulǵaıtýǵa sebep bolady. Óz kezeginde, bazalyq mólsherlemeniń tómendeýi banktik kredıt mólsherlemeleriniń tómendeýine de alyp kele almaýy múmkin. Inflıatsııa men ınflıatsııalyq kútýlerdiń ósýi, kredıtke suranys jáne daǵdarys jaǵdaıynda sapaly qaryz alýshylardyń jetispeýshiligi qaryz alý qunyna áser ete otyryp, táýekel úshin syıaqynyń ósýine yqpal etetin bolady. Salymdar boıynsha mólsherlemelerdiń tómendeýi salymdardy júıeden alyp qoıýǵa ákelýi múmkin, salymdardy dollarlandyrý jáne alyp qoıý nátıjesinde bank júıesiniń resýrstyq bazasy tómendeıdi», - dedi Ǵalymjan Pirmatov.