Krany kópqabatty úıge qulap ketken merdiger jazalanady - astana ákimdigi

NUR-SULTAN. QazAqparat – Nur-Sultan qalasy ákimdiginiń baspasóz qyzmeti turǵyn úıge krannyń qulaýyna qatysty tekserý júrip jatqanyn málim etti, dep habarlaıdy QazAqparat tilshisi.

«Nur-Sultan qalasynyń qalalyq orta sapasy jáne baqylaý basqarmasynyń eńbek ınspektsııasy avtokrandy tekserip, qorytyndysynda júk kóterý mehanızmin iske asyrýda ónerkásiptik qaýipsizdik erejeleri buzylǵanyn anyqtady. Atalǵan oqıǵany tergeý qorytyndysyna sáıkes merdigerge Qazaqstan zańy boıynsha shara qoldanylady. Oqıǵa bolǵan jerge qalalyq qyzmetter: Ónerkásiptik qaýipsizdik departamenti, «Esil» aýdany ákimi apparaty, «Nur-Sultan qalasy Qalalyq orta sapasy jáne baqylaý basqarmasy» mamandary bardy», - dep jazylǵan ákimdik málimetinde.

Resmı aqparat boıynsha, arnaıy qurylǵan jumys toby qalanyń qurylys obektilerindegi 121 munaraly krandy teksergen.

«Tekserý qorytyndysynda 81 krannyń jumysynan ereje buzý faktileri anyqtaldy. Munaraly krandardyń tehnıkalyq qujattamasynyń bolmaýy ereje buzýǵa negizgi sebep bolyp otyr. Atalǵan munaraly krandardyń jumysy kemshilikter qalpyna kelgenshe toqtatyldy», - dep jazady ákimdiktiń baspasóz qyzmeti.

Buǵan deıin Nur-Sultanda turǵyn úıdiń altynshy qabatyna kran qulaǵanyn jazǵan edik.