QR Joǵarǵy Sotynda Azamattyq is júrgizý kodeksiniń jańa jobasy talqylandy

ASTANA. Búgin QR Joǵarǵy Sotynda Azamattyq is júrgizý kodeksiniń jańa jobasyn talqylaýǵa arnalǵan dóńgelek ústel ótti. Sharaǵa Joǵarǵy Sot jáne jergilikti sottar sýdıalary, Konstıtýtsııalyq Keńes músheleri, Bas Prokýratýranyń, Sýdıalar odaǵynyń, quqyq qorǵaý organdarynyń, úkimettik emes uıymdardyń ókilderi men sheteldik sarapshylar qatysty.

Joǵarǵy Sotta qurylǵan jumys tobynyń músheleri, sýdıalar U.Súleımenovanyń, N.Mamontovtyń jáne Qaraǵandy oblystyq sotynyń azamattyq jáne ákimshilik ister jónindegi appelıatsııalyq sot alqasynyń tóraıymy J.Seıdalınanyń baıandamalary azamattyq sot óndirisiniń mindetteri men qaǵıdattary, Azamattyq is júrgizý kodeksi jobasynyń jalpy erejeleri, birinshi satydaǵy sot óndirisi men sot aktilerin qaıta qaraý máselelerine arnaldy. Sondaı-aq zań jobasyn jetildirýdiń negizgi baǵyttary boıynsha QR Bas prokýrorynyń orynbasary J.Asanov jáne Ádilet mınıstriniń orynbasary Z. Baımoldına, ǵalymdar men sheteldik sarapshylar sóz sóıledi.

Azamattyq is júrgizý kodeksiniń jobasy sottardyń azamattyq isterdi qaraý kezindegi tıimdiligin, shapshańdyǵy men minsizdigin arttyrýǵa baǵyttalǵan. Bul óz kezeginde, sot tóreligin júzege asyrý sapasyna, sot bıliginiń táýelsizdigin odan ári nyǵaıtýǵa septigin tıgizip, Qazaqstannyń álemdegi neǵurlym damyǵan 30 eldiń qataryna kirýine yqpal etetin bolady.

Jobada azamattyq ister boıynsha sot tóreligin júzege asyrýda týyndaıtyn qoǵamdyq qatynastardy retteý kózdelgen. Atap aıtqanda, azamattyq isterdi qaraý taraptardyń jaryspaly sóz sóıleýi negizinde júrgizilip, sýdıanyń sot talqylaýyna negiz bolǵan máseleni baqylaýdaǵy quzyreti azdaǵan deńgeıde ǵana saqtalatyn bolady.

Sonymen qatar, Kodekstiń jańa redaktsııasynda sot isine qatysýshylar men sýdıalardyń protsessýaldyq quqyqtary men mindetteriniń obektıvti teńgerimi kózdelgen. Daýlardy retteýdiń sottan tys mehanızmderin damytý úshin jekelegen sanattar boıynsha «Daýlardy sottan tys retteý» degen jańa taraý engiziledi. Kassatsııalyq satydaǵy sottyń isterdi apellıatsııalyq satydaǵy sottyń jańadan qaraýyna jiberý negizderi azaıtyldy. Mundaı ereje barlyq sot satylarynda memlekettik bajdyń engizilýimen úılesedi.

«Tatýlastyrý rásimderi» degen bólek taraýda medıatsııa tártibimen daýdy sheshýge baǵyttalǵan bitimgershilik kelisimder men sharttar jasaýdyń rásimderi men saldaryn egjeı-tegjeıli retteý qarastyrylady. Buǵan qosa, jobada azamattyq isterdi qaraý tártibin jeńildetýge, sonyń ishinde sottar qyzmetinde tehnıkalyq quraldardy keńinen qoldaný arqyly ońaılatýǵa baǵyttalǵan erejeler bar. Kózdelip otyrǵan barlyq sharalar halyqtyń áleýmettik turǵydan áljýaz toptarynyń múddesin qamtamasyz etý qajettiligin eskere otyryp, qabyldanbaq.

Dóńgelek ústel barysynda jobanyń kontseptýaldyq tujyrymdary men azamattyq is júrgizý zańnamasynyń tıimdiligin arttyrý joldary týraly qyzý pikirtalas oryn aldy. Azamattyq is júrgizý kodeksiniń jańa redaktsııasy jurtshylyqtyń keńinen talqylaýy úshin Joǵarǵy Sottyń saıtyna ornalastyryldy.