QR Joǵarǵy Soty Azamattyq is júrgizý kodeksiniń jańa jobasyn jurtshylyqtyń talqylaýyna usyndy
«Qazaqstan Respýblıkasynyń 2010-2020 jyldarǵa arnalǵan Quqyqtyq saıasat tujyrymdamasynda sot tóreligin qamtamasyz etý, azamattyq sot isine qatysýshylardyń quqyqtaryn barynsha qorǵaý, azamattardyń buzylǵan quqyqtary men bostandyqtaryn óz ýaqytynda qorǵaý jáne qalpyna keltirý, qoǵam men memleket múddesi máselelerine erekshe kóńil bólingen. 2013 jylǵy qarashada ótken Qazaqstan Respýblıkasy sýdıalarynyń VI sezinde Memleket basshysy sot júıesin odan ári damytý men azamattyq is júrgizý zańnamasyn jetildirýdi tapsyrǵan bolatyn» - dep atap ótilgen baspasóz baıanynda.
QR Joǵarǵy soty Azamattyq is júrgizý kodeksiniń jobasy sottardyń azamattyq isterdi qaraý kezindegi tıimdiligin, shapshańdyǵy men minsizdigin arttyrýǵa baǵyttalǵanyn atap ótedi, bul óz kezeginde, sot tóreligin júzege asyrý sapasyna, sot bıliginiń túbegeıli táýelsizdigin odan ári nyǵaıtýǵa septigin tıgizip, Qazaqstannyń álemdegi neǵurlym damyǵan 30 eldiń qataryna kirýine yqpal etetin bolady.
Jobada azamattyq ister boıynsha sot tóreligin júzege asyrýda týyndaıtyn qoǵamdyq qatynastardy retteý jáne azamattyq sot isin júrgizýdegi sýdıanyń róli qaıta baǵamdalǵan. Atap aıtqanda, azamattyq isterdi qaraý taraptardyń jaryspaly sóz sóıleýi negizinde júrgizilip, sýdıanyń sot talqylaýyna negiz bolǵan máseleni baqylaýdaǵy quzyreti azdaǵan deńgeıde ǵana saqtalatyn bolady.
Kodekstiń jańa redaktsııasynda sot isine qatysýshylar men sýdıalardyń protsessýaldyq quqyqtary men mindetteriniń obektıvti teńgerimi kózdelgen.
Daýlardy retteýdiń sottan tys mehanızmderin damytý úshin jekelegen sanattar boıynsha «Daýlardy sottan tys retteý» degen jańa taraý engiziledi.
Kásibı ókildik etý ınstıtýtynyń máselesi ózektilene tústi. Jobaǵa sáıkes taraptardyń múddesi úshin basqa adamdardyń sotqa qatysý múmkindigi saqtalady, bul rette krıterıı retinde olardyń joǵary zańgerlik biliminiń mindetti túrde bolýy belgilenedi. Joǵarǵy Sotqa sot aktilerin qaıta qaraýǵa ótinish beretin taraptardyń múddesin bildirý tıisti akkredıtteýden ótken advokattarǵa bekitiledi.
Kassatsııalyq satydaǵy sottyń isterdi apellıatsııalyq satydaǵy sottyń jańadan qaraýyna jiberý negizderi azaıtyldy. Mundaı ereje barlyq sot satylarynda memlekettik bajdyń engizilýimen úılesedi.
Tatýlastyrý rásimderin keńinen qoldaný jáne azamattyq sot isin júrgizý mindetterin iske asyrý maqsatynda jobada daýdy beıbit retteýge yqpal etý kózdeledi.
«Tatýlastyrý rásimderi» degen bólek taraýda medıatsııa tártibimen daýdy sheshýge baǵyttalǵan bitimgershilik kelisimder men sharttar jasaýdyń rásimderi men saldaryn egjeı-tegjeıli retteý qarastyrylady.
Buǵan qosa, jobada azamattyq isterdi qaraý tártibin jeńildetýge, sonyń ishinde sottar qyzmetinde tehnıkalyq quraldardy keńinen qoldaný arqyly ońaılatýǵa baǵyttalǵan erejeler bar.
Kózdelip otyrǵan barlyq sharalar halyqtyń áleýmettik turǵydan áljýaz toptarynyń múddesin qamtamasyz etý qajettiligin eskere otyryp, qabyldanatyn bolady.
Jańa redaktsııadaǵy Azamattyq is júrgizý kodeksi jurtshylyqtyń keńinen talqylaýyna shyǵaryldy. Zań jobasy Joǵarǵy Sottyń www.sud.kz ınternet-resýrsyna ornalastyryldy. Barlyq eskertýler men usynystar zań jobasyn odan ári jetildirý kezinde eskeriletin bolady.