QR jáne RF vıtse-premerleri ónerkásiptik kooperatsııa salasyndaǵy yntymaqtastyq máselelerin qarastyrdy
10:12, 26 Naýryz 2021
NUR-SULTAN. QazAqparat - Máskeýde QR Premer-Mınıstriniń orynbasary Roman Sklıar Reseı Federatsııasy Úkimeti Tóraǵasynyń orynbasary ıÝrıı Borısovpen kelissóz júrgizdi, dep habarlaıdy primeminister.kz saıty.
Qazaqstan Premer-Mınıstri Asqar Mamınniń 22 naýryzda ótken Reseı Úkimetiniń Tóraǵasy Mıhaıl Mıshýstınmen kezdesýiniń qorytyndysy boıynsha ýaǵdalastyqtardy damytý aıasynda vıtse-premerler Qazaqstan-Reseı ónerkásiptik kooperatsııasy salasyndaǵy birlesken is-qımyl baǵdarlamasy sheńberindegi ekijaqty yntymaqtastyqtyń ózekti máselelerin qarastyrdy.
Taraptar buryn kelisilgen birlesken jobalardy iske asyrýdy jedeldetý jónindegi aǵymdaǵy jaǵdaı men budan keıingi qadamdardy talqylady. Sondaı-aq, Qazaqstandaǵy ónerkásiptik kooperatsııanyń jańa perspektıvalyq jobalaryn zerdeleý arqyly ınvestıtsııalyq yntymaqtastyqty keńeıtý máseleleri talqylandy. Budan arǵy birlesken jumys perspektıvalary týraly aıta otyryp, ózara tıimdi ekonomıkalyq yntymaqtastyq qaǵıdattaryna, ónerkásip, saýda-ekonomıkalyq, ınvestıtsııalyq salalarda neǵurlym tyǵyz ózara is-qımyl jasaý úshin qosymsha múmkindikter jasaý boıynsha birlesken sharalardy iske asyrýǵa ózara beıildilik bildirildi. Kezdesýge qatysýshylar Qazaqstan men Reseı arasyndaǵy úkimetaralyq dıalogtyń tıimdiligi men qajettiligin atap ótip, ózara baılanystardyń joǵary qarqynyn saqtaýǵa kelisti.