QR jańa QІJK-inde mıllıondardy jymqyrǵan adamnyń múlkin sot úkiminsiz tárkileý kózdeledi

ASTANA. 30 qazan. QazAqparat - Búgin Úkimet úıinde QR Prezıdenti janyndaǵy Adam quqyqtary jónindegi komıssııanyń sarapshylar keńesi elimizdiń jańa Qylmystyq is júrgizý kodeksiniń jobasyn talqylaýǵa arnalǵan otyrys ótkizdi.

Alqaly jıyn barysynda Qylmystyq is júrgizý kodeksi jobasynyń jekelegen normalary, olardyń QR Konstıtýtsııasy men elimizdiń adam quqyqtary salasyndaǵy halyqaralyq mindettemelerine sáıkestigi jan-jaqty talqylandy. Máselen, QR Konstıtýtsııalyq keńesiniń múshesi Anar Jaıylǵanovanyń atap ótýinshe, búginde mıllıondaǵan qarjyny jymqyryp shetel asqandardyń múlkin, qarjysyn tárkileý múmkin bolmaı otyr. «Óıtkeni, atalǵan adamǵa qatysty sot úkimin shyǵarǵan joqpyz. Al sot úkimi shyqpasa, onyń múlkin nemese qarajatyn tárkileı almaımyz. Endigi ýaqytta zaman talabyna sáıkes, atalǵan adamnyń kinási tergeý amaldary barysynda dáleldense, onda jańa qylmystyq is júrgizý kodeksinde sot úkimin shyǵarmaı-aq múlkin tárkileý kózdelgen»,- deıdi ol. Aıta keterligi, jańa kodeks 16 bólimnen, 72 taraýdan jáne 677 baptan turady.