QR Ulttyq ulanynyń jalǵyz ushqysh qyzy óziniń alǵashqy ushýyn Astana kúnine arnaıdy (FOTO)

ALMATY. QazAqparat - Almatydaǵy QR Ulttyq ulanynyń «Ońtústik» óńirlik qolbasshylyǵyna qarasty 3656 áskerı bóliminiń aǵa ushqysh shtýrmany (tikushaq toby) 23 jastaǵy Ardana Botaı tuńǵysh ret aldaǵy 6 shilde kúni AN-26 áskerı ushaǵynyń shtýrvalyna otyrady. Ol óziniń alǵashqy ushý saparyn súıikti qalasy - Astananyń týǵan kúnine arnamaq. Ardana QR Ulttyq ulany quramyndaǵy jalǵyz ushqysh qyz. Ol Qaraǵandy oblysynda týyp-ósken. Kóp jyldar Astanada turǵan.

QR Ulttyq ulany qolbasshylyǵy áskerı oqý ornyn bitirip kelgen ushqysh qyzdyń ótinishin qup kórip, 6 shilde kúni áskerı ushaqtyń shtýrvalyna otyrýǵa múmkindik berip otyr.

«Men 2011 jyly Astana qalasyndaǵy №2-shi mektep-gımnazııasyn bitirgen soń, sol jyly Almatydaǵy Azamattyq avıatsııa akademııasyna «Ushý apparatary men qozǵaltqyshtarynyń ushý eksplýatatsııasy» mamandyǵy boıynsha oqýǵa tústim. 2013 jyly Qazaqstan men Fınlıandııa arasyndaǵy yntymaqtastyq jónindegi memorandýmnyń arqasynda, ekinshi kýrstan keıin, Helsınkı qalasyndaǵy áskerı ushqyshtar daıyndaıtyn «Patrııa» mektebine qabyldandym. Sóıtip, 2015 jyly kommertsııalyq ushqyshtyń eýropalyq standarty - № FIN.FCL.83136 lıtsenzııasyn aldym. 2016 jyly naýryzda Akademııada mamandyǵym boıynsha bakalavr dárejesine ıe boldym. Meniń armanym áskerı ushqysh bolý edi. Endi sol armanyma qol jetkizgeli jatyrmyn. Qazir, tikushaqty jáne áskerı AN-26 ushaǵyn basqarýdy jan-jaqty meńgerip jatyrmyn», - dedi A. Botaı ózi jaıynda.

QR Ulttyq ulany «Ońtústik» óńirlik qolbasshylyǵy baspasóz qyzmetiniń habarlaýynsha, ázirge Ardananyń 240 saǵattyq ushý tájirıbesi bar.