QR Ulttyq mýzeıinde «Ulttyq Ulan Táýelsizdik kúzetinde» atty fotokórme ótýde

ASTANA. QazAqparat - Qazaqstan Respýblıkasy Ulttyq mýzeıinde QR Ulttyq Ulanynyń fototilshisi Vıacheslav Gelblıngtiń «Ulttyq Ulan Táýelsizdik kúzetinde» atty jeke foto kórmesi ótti, dep habarlaıdy Mádenıet jáne sport mınıstrliginiń baspasóz qyzmeti.

Sharaǵa QR Ulttyq Ulany Bas qolbasshysynyń orynbasary general-maıor Muhamedqalı Qusaıynuly, Ulttyq Ulannyń ardagerler Keńesiniń tóraǵasy general-maıor Qalıakpar Toqyshev jáne 5573, 6636, 3660 áskerı bólimderiniń jaýyngerleri qatysty.

Kórme Elbasy Jarlyǵymen jasaqtalǵan Іshki áskerdiń, qazirgi tańdaǵy Qazaqstan Respýblıkasy Ulttyq Ulanynyń qurylǵanyna 25 jyl tolýyna oraı uıymdastyrylyp otyr.
Shara barysynda sóz alǵan Ulttyq Ulannyń ardagerler Keńesiniń tóraǵasy general-maıor Qalıakpar Toqyshev:

«Vıacheslav Gelblıngtiń bul kórmesi Ulttyq Ulan qurylǵaly bergi onyń jasaǵan eńbekteriniń aınasy ispetti jáne bul fotosýretterden tek ótkenimizdi ǵana emes, sondaı-aq, bolashaǵymyzdy da tanyp bilýge bolady. Osy kórme arqyly el tynyshtyǵyn kúzetken sarbazdarymyzdyń ómiri, eren eńbegi keıingi óskeleń urpaqqa da úlgi bola alady deýge tolyq negiz bar», - dep kórmeniń mańyzyn atap ótti.

Al óziniń eńbekteri jóninde avtor Vıacheslav Gelblıng: «Men eń aldymen fotograftan buryn, Otan qorǵaýshysymyn. Odan keıin, sol el qorǵaýshylarynyń fotoshejiresin jasaýshymyn. Bul kórmege biz sońǵy bes jyl boıy daıyndaldyq. Úlken daıyndyqpen, tolqynyspen jasalǵan dúnıe boldy. Men avtor retinde osy týyndylarymnyń el nazaryna usynylýy úshin atsalysqan barsha jandarǵa alǵysymdy aıtamyn»,- dedi.

Quqyqtyq tártip áskeriniń bas fototilshisi Vıacheslav Gelblıngtiń fotoapparatynyń obektıvine túspegen oqıǵa, nysan kemde-kem. Sońǵy15 jyl boıynda qazaq áskeriniń fotoshejiresin qattaýda óz isiniń kásibı sheberi, maıtalman fototilshi zapastaǵy praporşık V.Gelblıngtiń sińirgen eńbegi ólsheýsiz. Ol túsirgen fotosýretterdiń kópshiligi qazir jurtshylyq asa bir súıispenshilikpen ári iltıpatpen tamashalaıtyn tarıh enshisiniń jarqyn bir sátin beınelegen aıshyqty foto týyndylarǵa aınaldy. Onyń jeke muraǵatynda bir mıllıonnan asa fotosýret saqtaýly. Solardyń ishindegi eń mańyzdy oqıǵalardy beıneleıtin reportajdyq fotosýretteri «Ulttyq Ulan Táýelsizdik kúzetinde» atty kórmede usynyldy.

Kórme 12 qańtarǵa deıin jalǵasady.