QR Ulttyq muraǵatynda Elbasy N.Nazarbaevtyń mekteptegi tabelderi qoıylǵan kórme ashyldy (FOTO)

ASTANA. QazAqparat - Qazaqstan Respýblıkasynyń Ulttyq muraǵatynda «Elin súıgen, eli súıgen Elbasy» atty qundy qujattar kórmesi ashyldy. Tuńǵysh Prezıdent kúnine oraı ashylǵan kórmeni Qazaqstan Respýblıkasynyń Ulttyq muraǵaty, «Nur Otan» partııasy jáne Qazaqstan Respýblıkasynyń Qorǵanys mınıstrligi uıymdastyryp otyr.

Kórmege kelgen jan egemen Qazaqstannyń alǵashqy zań jobalaryn, elordany Aqmolaǵa kóshirý týraly qujattardy, Temirtaý qalasyndaǵy Tuńǵysh Prezıdenttiń tarıhı-mádenı ortalyǵy usynyp otyrǵan Elbasynyń ómirbaıanymen tanysa alady. Sondaı-aq munda Qazaqstan Prezıdentiniń Temirtaý men Qaraǵandy qalalaryndaǵy eńbek joly jaıly derekter, túrli ótinishteri, tipti, mekteptegi oqý úlgerimi týraly tabelderi qoıylǵan. Muraǵat qyzmetkerleriniń aıtýynsha, kórmeniń maqsaty - muraǵattyq qujattar men derekter arqyly Tuńǵysh Prezıdent Nursultan Nazarbaevtyń eren eńbegi men ónegeli ómir jolyn dáripteý. Kórmedegi qujattar egemen Qazaqstannyń tarıhymen tanystyryp, Nursultan Ábishuly Nazarbaevtyń táýelsiz memleketti qalyptastyrý, saıası jáne áleýmettik-ekonomıkalyq reformalardy júzege asyrýdaǵy kúsh-jigeri men kóshbasshy retindegi qasıetterin aıqyn kórsetedi.