QR Ulttyq kitaphanasynda Elbasy týraly 33 myńǵa jýyq materıal bar

ALMATY. QazAqparat - Qazaqstan Respýblıkasynyń Ulttyq kitaphanasynyń bazasynda Elbasy Nursultan Nazarbaev ataýymen 33 myńǵa jýyq materıal bar, dep habarlaıdy «QazAqparat» tilshisi.

QR Ulttyq kitaphanasynda «Elbasy» taqyrybymen jumys istep turǵan turaqty kórme bar. Kitaphana qyzmetkerleri kórmede 3000 astam kitap turǵanyn aıtty.  

«Turaqty kórme jańa túsken basylym materıaldarymen tolyqtyrylyp otyrady. Qazirgi ýaqytta kórmede 3000-nan astam kitap tur. Al jalpy kitaphana bazasynda Elbasy týraly 32 483 materıal bar. Onyń ishinde, Nursultan Nazarbaevtyń óz kitaptary, Prezıdent týraly jazylǵan kitap, maqalalar men ǵylymı dıssertatsııalar, avtoreferattardy aıtýǵa bolady», - dedi kitaphananyń Mádenı jáne kórmeler qyzmetiniń jetekshisi Janar Alpysbaıqyzy.
 

«Elbasy» kórmesi birneshe taqyryptan turady. Onda «Elbasy ómiri», «Elbasy qyzmetteri», «Elbasy eńbegi»,  «Elbasy eńbekteri shet tilderinde», «Elbasy joldaýlary» jáne Prezıdent týraly kitaptardan quralǵan «Eli súıgen, elin súıgen Elbasy» taqyryptary boıynsha kitaptar qoıylǵan. Ár taqyrypqa baılanysty jeke-jeke bólim bar. Mysaly, «Elbasy ómiri» bóliminde Prezıdenttiń oqýshy kezinde jazyp, «Kommýnızm úshin» gazetinde jaryq kórgen «Alystaǵy qytaılyq dosyma» atty haty oqyrman nazaryna usynylǵan. Hat atalǵan basylymnyń 1958 jylǵy 16 naýryzyndaǵy №30-shi sanynda jaryq kórgen. Onda bolashaq Qazaqstan basshysy kommýnıstik Qytaıdan joldaǵan jas komsomoldyń dostyq qolyn sozǵan hatyna jaýap bergen.
 

Elbasy hatynda bolashaq armanymen bólisip, óziniń 10-synypta oqıtynyn aıtqan. 

«Men Almaty oblysy Qaskeleń aýdany, Qaskeleń selosynyń Abaı atyndaǵy orta mektebinde 10-synypta oqımyn. 1-klastan bastap búginge deıin jaqsy oqyp kelemin. 1956 jyldan beri komsomol qataryndamyn», - dep jazǵan Elbasy.

Kitaphana qyzmetkerleri Nursultan Nazarbaev bazasy únemi jańaryp turatynyn jáne «Elbasy» kórmesiniń aýqymy aldaǵy ýaqytta ulǵaıatynyn aıtty.