QR Ulttyq ǵarysh agenttiginiń alqa otyrysy ótti
Onda 2011 jylǵy Qazǵarysh uıymdary qyzmetiniń nátıjeleri talqylandy jáne 2012 jylǵa arnalǵan mindetter aıqyndaldy. Alqanyń jumysyna Agenttiktiń qurylymdyq bólimsheleriniń basshylary men vedomstvolyq uıymdarynyń basshylyǵy qatysty.
Jıyn barysynda ótken jyly Qazǵarysh uıymdarymen ǵarysh qyzmeti salasyn jetildirý jónindegi uıymdastyrýshylyq jáne tájirıbelik sharalarynyń kesheni júzege asyrylǵandyǵy atalyp ótti. Agenttik tóraǵasy Talǵat Musabaev birqatar naqty mindetterdi alǵa qoıdy. Atap aıtqanda, Qazaqstan Respýblıkasynyń údemeli ındýstrııalyq-ınnovatsııalyq damýynyń 2010-2014 jyldarǵa arnalǵan memlekettik baǵdarlamasynyń bólimderin oryndaýdyń alǵysharttary qalyptasqan. Onyń ishinde «KazSat» spýtnıktik baılanys jáne habar taratý júıesin qurý («KazSat-2», «KazSat-3», rezervtik jerústi basqarý kesheni), «Baıqońyr» ǵarysh aılaǵynda ekologııalyq qaýipsiz «Báıterek» ǴZK qurý, ǵarysh apparattaryn qurastyrý-synaý keshenin qurý, Jerdi qashyqtyqtan zondtaýdyń ǵaryshtyq júıesin qurý, Qazaqstan Respýblıkasynyń joǵary dáldikti spýtnıktik navıgatsııa júıesiniń jerústi ınfraqurylymyn qurý, «Baıqońyr» ǵarysh aılaǵyndaǵy «Zenıt», «Dnepr» ǵaryshtyq zymyran keshenderin kommertsııalyq paıdalaný jobalaryna qatysý sekildi ınvestıtsııalyq jobalardy iske asyrý kózdeledi.
Sondaı-aq, alqa otyrysynda «Qazaqstan Ǵarysh Sapary» ulttyq kompanııasy» AQ-tyń, «Báıterek» BK» AQ-tyń, «Ǵaryshtyq baılanys jáne radıoelektrondyq quraldardyń elektr magnıttik úılesimdiligi respýblıkalyq ortalyǵy» AQ-tyń, «Ulttyq ǵaryshtyq zertteýler men tehnologııalar ortalyǵy» AQ-tyń, «Infrakos» RMK-niń, «Infrakos-ekos» EMK-niń esepteri usynylǵan bolatyn.
Ǵarysh uıymdarynyń basshylary otandyq ǵarysh qyzmetin damytýdyń basty maqsattary men mindetterin esepke ala otyryp, 2012 jylǵa arnalǵan jumys josparlarymen tanystyrdy.