QR Ulttyq Banki júrgizilip jatqan valıýtalyq ınterventsııalardyń mehanızmin túsindirdi
«Teńgeniń aıyrbastaý baǵamyna qatysty birinshi másele boıynsha, erkin ózgermeli aıyrbastaý baǵamynyń qoldanystaǵy rejımi suranys pen usynys balansy arqyly naryqtyq qaǵıdattar negizinde teńge baǵamyn qalyptastyrýdy bildiredi. Ulttyq Bank aıyrbastaý baǵamynyń belgili bir deńgeıine qol jetkizý maqsatynda valıýtalyq ınterventsııa júrgizbeıdi. Saýda-ekonomıkalyq ózara baılanystardyń tyǵyz bolýyna qatysty teńge baǵamyn belgileýde rýbldiń yqpaly aıqyn baıqalady. Qazaqstan Eýrazııalyq ekonomıkalyq odaqtyń múshesi, Reseı Federatsııasy – bizdiń negizgi saýda áriptesimiz, onyń úlesine 2021 jyldyń qorytyndysy boıynsha qazaqstandyq ımporttyń 42%-y tıesili», - dep jazdy Ǵalymjan Pirmatov depýtattyq saýalǵa bergen jaýabynda.
Ulttyq bank tóraǵasy qazir bolyp jatqan geosaıası oqıǵalar saldarynan Reseı rýblinde buryn-sońdy bolmaǵan qubylmalylyq baıqalǵanyn jáne munyń teńgege qysym jasaıtynyn, Qazaqstannyń qarjylyq turaqtylyǵy úshin syn-qater týdyryp otyrǵanyn moıyndady.
«Ulttyq Bank teńgeniń Reseı rýblimen uqsas serpinin negizsiz jáne túbegeıli bekitilmegen dep sanaıdy, óıtkeni bizdiń valıýtamyz úshin syrtqy jáne ishki jaǵdaılar qazirgi Reseı valıýtasyna yqpal etetin talaptarǵa múldem uqsamaıdy. Osyǵan baılanysty rýbldiń shamadan tys aýytqýynyń teńgege negizsiz áser etýin tómendetý maqsatynda Ulttyq Bank «Qazaqstan Respýblıkasynyń Ulttyq Banki týraly» QR Zańynda kózdelgen valıýtalyq ınterventsııalardy júrgizedi», - deıdi Ǵ. Pirmatov.