QR Ulttyq banki: Naýryz ben sáýir aılarynyń mólsherlemesi qaıta qaraldy

NUR-SULTAN. QazAqparat - Qazaqstannyń depozıtterge kepildik berý qory bazalyq mólsherlemeniń ósýine baılanysty teńgedegi depozıtter boıynsha 2020 jyldyń naýryz ben sáýir aılaryna usynylǵan eń joǵary syıaqy mólsherlemesin qaıta qarady.

Bul týraly Qazaqstannyń depozıtterge kepildik berý qorynan habarlandy.

Qordyń resmı saıtyndaǵy málimetter boıynsha, aǵymdaǵy jyldyń 10 naýryzynan bastap, Qazaqstan Respýblıkasy Ulttyq bankiniń bazalyq mólsherlemesi jylyna 12 paıyz deńgeıinde bekitildi.

Eske sala ketsek, jeke tulǵalardyń qaıtadan tartylǵan depozıtteri boıynsha maksımaldy syıaqy mólsherlemesin anyqtaý jáne bekitý ádistemesine sáıkes usynylǵan mólsherlemeler bazalyq mólsherleme ózgergende qaıta qaralyp, ol bekitilgen kúnnen bastap kúshine enedi.

Ózgerister merzimsiz salymdarǵa qatysty boldy. Óıtkeni bul salymdar Ulttyq banktiń bazalyq mólsherlemesi negizinde esepteledi. Sonymen mólsherlemeler 9,8 paıyzdan 12,5 paıyzǵa deıin ósti. Sonymen qatar 3 jáne 6 aılyq merzimdi depozıtter jáne 3 aılyq jınaq aqsha salymy boıynsha mólsherlemeler de 13 paıyzǵa deıin joǵarylady.

Aıta ketelik, atalǵan depozıtter boıynsha mólsherlemeler myna mánderdiń eń úlkenine teń bolady: ortasha ólshemdi naryqtyq syıaqy mólsherlemesi plıýs spred nemese bazalyq mólsherleme plıýs spred.