QR Ulttyq banki damýshy elderdiń valıýtalaryna sholý usyndy
25 maýsymdaǵy saýda-sattyq qorytyndysy boıynsha teńgeniń naryqtyq baǵamy AQSh dollary úshin 426,94 teńge bolyp qalyptasty. Osylaısha, bir aptada 0,02% (427,82-den) nyǵaıdy.
2021 jyldyń 18-25 maýsymy aralyǵynda syrtqy valıýtalyq naryqta damýshy elderdiń valıýtalary jan-jaqty dınamıkadaǵy sıpatta boldy.
AQSh Prezıdenti D.Baıden ekonomıkanyń ınfraqurylymyn modernızatsııalaý jóninde 579 mlrd dollarǵa teń mámile boıynsha Kongreste aldyn ala kelisimge qol jetkeni týraly jarııa etti. AQSh FRJ tóraǵasy ınflıatsııa boljamnan asyp túskenin, alaıda, aldaǵy ýaqytta azaıatynyn málim etti.
Anglııa banki bolsa aqsha-nesıe saıasatynyń parametrlerin ózgerissiz (0,1%) qaldyra otyryp, ınflıatsııanyń jedeldeýine qaramastan jýyrda osy saıasatty qataıtý protsesi bastalady degen boljamdardy joqqa shyǵardy. Jańa shtamnyń saldarynan Covid-19 juqtyrǵandardyń sany artyp, bul álemde taǵy da shekteý sharalary enedi degen qaýip tóndirip otyr.
Damýshy elderdiń valıýta baǵamdarynyń qarqyny AQSh dollaryna qatysty tómendegideı qalyptasty:
• meksıkalyq peso negizgi stavka 4,25% deıin ósken soń (25 b.p.) jáne bolashaqta taǵy ósedi degen boljamǵa baılanysty 4,1% nyǵaıdy (20,66-dan 19,82-ge deıin);
• brazılııalyq real OB-tiń 2021 jyly ekonomıka 4,6% deıin ósedi degen boljamǵa (3,6% - burynǵy boljam) baılanysty 3,1%-ǵa nyǵaıdy (5,09-dan 4,93-ke deıin);
• ońtústikafrıkalyq rand AQSh-ta ınfraqurylymdyq josparǵa qatysty mámile aldyn ala kelisildi degen aqparattyń shyǵýyna baılanysty 1,4%-ǵa nyǵaıdy (14,35-ten 14,15-ke deıin);
• Reseı rýbli eksporterlerge salyq tóleıtin kez sharyqtaý shegine jetken soń, 1,2%-ǵa nyǵaıdy (72,93-ten 72,06-ǵa deıin);
• Túrik lırasy 0,3% álsiredi (8,74-ten 8,77-ge deıin);
• Úndi rýpııasy 0,4% álsiredi (73,86-dan 74,19-ǵa deıin). Munaı kotırovkalarynyń ósimi Úndi eliniń ulttyq valıýtasyna qysym kórsetýde.