QR Úkimet basshysy Eýrazııalyq úkimetaralyq keńestiń otyrysyna qatysady

<p>ASTANA. KAZINFORM &ndash; 2024 jylǵy 3-4 maýsymda Nesvıj qalasynda (Belarýs) QR Premer-Mınıstri Oljas Bektenov Eýrazııalq ekonomıkalyq odaqqa (EAEO) múshe memleketterdiń úkimet basshylarymen birlesip Eýrazııalyq úkimetaralyq keńestiń kezekti otyrysyna qatysady.</p>

Shaqyrylǵan qonaqtar retinde Ázerbaıjan Premer-mınıstri, TMD Atqarýshy hatshysy, Eýrazııalyq damý bankiniń basqarma tóraǵasy jáne Eýrazııalyq turaqtandyrý jáne damý qorynyń jobalaý blogynyń atqarýshy dırektory qatysady dep josparlanǵan.

«Keńes otyrysynyń kún tártibi kedendik retteý, kólik jáne logıstıkalyq salalardaǵy ózara is-qımyl, onyń ishinde temirjol tasymaldaryn tsıfrlandyrý, aýyl sharýashylyǵy ónimderiniń keıbir ataýlary boıynsha ındıkatıvtik teńgerimderdi qalyptastyrý, transshekaralyq naryqtardaǵy básekelestik, EAEO-ǵa múshe memleketterdiń monopolııaǵa qarsy organdarynyń qyzmeti jáne basqa da ózekti taqyryptardy qosa alǵanda, saýda-ekonomıkalyq yntymaqtastyqtyń keń aýqymdy baǵyttaryn qamtıdy. Qazirgi kezde ázirlenip jatqan EAEO-ǵa múshe memleketterdiń bıýdjetteri arasynda kedendik ákelý bajdarynyń somalaryn bólý normatıvterin esepteýdiń jańa ádistemesin talqylaýǵa erekshe nazar aýdarylady», - dedi Syrtqy ister mınıstrliginiń resmı ókili Aıbek Smadııarov mınıstrliktegi aptalyq baspasóz máslıhatynda.

Belarýske jumys saparynyń resmı baǵdarlamasy aıasynda3 maýsymda Qazaqstan Premer-Mınıstri Keńestiń basqa qatysýshylarymen birlesip «Belagro – 2024» halyqaralyq mamandandyrylǵan kórmesine qatysady.