QR UQK Shekara qyzmeti pandemııa kezinde memlekettik shekarany kesip ótý erejelerin túsindirdi

NUR-SULTAN. QazAqparat – UQK Shekara qyzmetiniń @shekaraknbkz Instagram akkaýntynyń tikeleı efırinde memlekettik shekarany kesip ótý máseleleri boıynsha onlaın-konferentsııa ótti, dep habarlaıdy QazAqparat tilshisi.

Instagram-daǵy resmı paraqshada ótken onlaın-brıfıng barysynda Shekara qyzmeti Qazaqstan Respýblıkasynyń aýmaǵyna kiretin barlyq adamǵa koronavırýs ınfektsııasyna qatysty testtiń teris nátıjesi bar PTR anyqtamasy qajet ekenin aıtty. Bas memlekettik sanıtarlyq dárigerdiń sheshimi osyndaı.

Sondaı-aq, baspasóz máslıhatynda shekaradan ótý tártibine sáıkes Qazaqstan Respýblıkasynyń azamattaryna 4 aqpannan bastap 30 kúnde bir ret shetelge shyǵýǵa ruqsat beriletini aıtyldy.

«Osylaısha, Qazaqstan Respýblıkasynyń azamaty kez kelgen maqsatta Qazaqstan aýmaǵynan shetelge 30 kúnde bir ret shyǵa alady. Shetelge barý jıiligi elden shyqqan kezde anyqtalady. Elge oralǵannan keıin kelesi sapar Qazaqstan Respýblıkasyna kelgen kúnnen bastap 30 kún ótken soń ǵana múmkin bolady», - dep túsindirdi QR UQK Shekara qyzmetindegiler.