QR úkimettik jumys toby koreıalyq bıznes ókilderimen kezdesti

NUR-SULTAN. QazAqparat - QR Premer-Mınıstriniń orynbasary Roman Sklıardyń jetekshiligimen Koreıa Respýblıkasymen yntymaqtastyq jónindegi úkimettik jumys toby koreıalyq isker toptardyń ókilderimen kezdesý ótkizdi. QazAqparat bul týraly primeminister.kz saıtyna silteme jasap habarlaıdy.

Taraptar qoldanystaǵy jobalar boıynsha birlesken jumysty, sondaı-aq Qazaqstan-Koreıa strategııalyq ekonomıkalyq jáne ınvestıtsııalyq seriktestigin odan ári damytý perspektıvasyn jan-jaqty talqylady.

Koreıalyq taraptan 15-ke jýyq iri kompanııa: «Lotte Confectionery», «Medical Partners Korea», «Dongil Construction», «Samsung Electronics», «Daewoo Bus Company», «Mark Point», «POSCO», «SK E&C», sondaı-aq «KHIDI» ındýstrııa jáne densaýlyqty damytý ınstıtýtynyń, «KOTRA» saýdany yntalandyrý agenttigi sııaqty uıymdardyń basshylyǵy qatysty.

Kezdesý barysynda koreıalyq kompanııalardyń basshylary qoldanystaǵy jobalardy iske asyrý tájirıbesimen bólisti, Qazaqstan ekonomıkasynyń basym sektorlary – qurylys, taý-ken metallýrgııasy kesheni, aqparattyq tehnologııalar, energetıka, mashına jasaý jáne ózge de salalardaǵy jańa ınvestıtsııalyq josparlary týraly aıtty. Qazaqstandyq tarap eki el arasyndaǵy ekonomıkalyq yntymaqtastyqtyń zor áleýeti bar ekenin atap ótti, ekijaqty yntymaqtastyqty nyǵaıtý múmkindikterine nazar aýdaryldy.