QR Úkimetiniń qoldaýymen Ázerbaıjanǵa 40 júk lokomotıvi eksporttaldy
2021 jylǵy qazanda QR saýda jáne ıntegratsııa mınıstri Baqyt Sultanov pen Alstom kompanııasynyń Afrıka, Taıaý Shyǵys jáne Ortalyq Azııa aımaǵy boıynsha prezıdenti Endrıý DeLeone Ózara túsinistik jáne yntymaqtastyq týraly memorandýmǵa qol qoıdy.
2014 jyly Alstom Nur-Sultan qalasynda shyǵarylatyn 40 Prima T8 AZ8A aýyr salmaqty lokomotıvterin qosa alǵanda, 288 mln eýro somasyna 50 elektrovoz jetkizýge kelisimshartqa qol qoıdy.
Prima T8 lokomotıvi — aımaqtyq temirjol qatynasyn damytýǵa yqpal etetin álemdegi eń qýatty elektrovozdardyń biri.
Elektrovozdardan basqa, Ázerbaıjanǵa relster de jetkiziledi. Qazaqstan – Eýropany, Taıaý Shyǵysty, Azııa men Reseıdi jańa Jibek joly arqyly baılanystyratyn mańyzdy kólik toraby.
Uzyndyǵy shamamen 21 000 shaqyrym bolatyn Qazaqstannyń temirjol jelisi álemdegi kólemi boıynsha úshinshi jeli jáne tehnıkalyq qyzmet kórsetý jumystary úshin mańyzdy naryq bolyp tabylady.
Sonymen qatar Qazaqstannyń Ázerbaıjanmen ózara saýdasy 2021 jyly 332,2 mln dollardy qurady, bul 2020 jylmen salystyrǵanda 3 ese joǵary.
Jalpy, Qazaqstannan Ázerbaıjanǵa eksport 2021 jyly 3,4 esege artyp, 287,9 mln dollardy qurady. 2021 jyly Qazaqstanǵa Ázerbaıjannan ımport 77,3% ósip, 44,4 mln dollardy qurady.
Óńdelgen taýarlar eksportyn belsendi ilgeriletý úshin Saýda jáne ıntegratsııa mınıstrligi qazaqstandyq óndirýshilerge eksporttyq akseleratsııa baǵdarlamasy, Alibaba platformasyna shyǵarý, saýda-ekonomıkalyq mıssııalar arqyly jan-jaqty qoldaý kórsetedi, sondaı-aq tolyq konsýltatsııalyq-saraptamalyq qoldaý kórsetedi. 2022 jyly eksporttyq akseleratsııa baǵdarlamasy aıasynda qazaqstandyq óndirýshiler men qyzmet kórsetýshilerdiń Ázerbaıjan naryǵyna shyǵýy josparlanǵan. Atalǵan qural qosymsha eksport kólemin arttyrýǵa, sondaı-aq jańa qazaqstandyq taýarlardy Ázerbaıjanǵa shyǵarýǵa múmkindik beredi.
Aıta keteıik, «Eksporttyq akseleratsııa» baǵdarlamasy Memleket basshysynyń tapsyrmasy boıynsha 2020 jyly iske qosyldy jáne eksporttyq áleýeti joǵary taýarlar men qyzmetterdi jyldam ilgerletýge baǵyttalǵan. 2021 jyldyń qorytyndysy boıynsha «Eksporttyq akseleratsııa» baǵdarlamasy aıasynda syrtqy naryqqa 130 jańa oıynshy shyǵaryldy.