QR Úkimetinde ınvestıtsııalyq ahýaldy jaqsartýdyń jańa tetikteri talqylandy

NUR-SULTAN. QazAqparat - QR Premer-Mınıstri Asqar Mamın Amerıka saýda palatasynyń Atqarýshy dırektory Dorıs Bredbıýrımen, Ulybrıtanııa elshisi Maıkl Gıffordpen, Kanada elshisi Nıkolas Brýssomen, Eýropalyq odaq elshisi Sven-Olov Karlssonmen, QR-daǵy AQSh isteri jónindegi ýaqytsha senimdi ókili Teodor Lıngpen kezdesti, dep habarlady primeminister.kz.

Kezdesý barysynda ınvestıtsııalyq yntymaqtastyqty keńeıtý jáne QR Úkimetiniń ınvestorlardy qoldaý ekojúıesin damytý jónindegi jańa tetikteri aıasynda ózara is-qımyldy odan ári arttyrý máseleleri talqylandy.

QR Premer-Mınıstri ekonomıka damýynyń, saýda jáne ınvestıtsııalar ósiminiń oń qarqynyn atap ótti. 2018 jyly Qazaqstanǵa tikeleı sheteldik ınvestıtsııalardyń túsimi 15,8% ósip, 24 mlrd dollardy qurady. Ótken jyly Qazaqstannyń syrtqy saýda kólemi 20% artty.

«Qazaqstan Úkimetiniń ınvestıtsııalardy tartýǵa asa qolaıly jaǵdaılar jasaýǵa ári ınvestorlardyń quqyqtaryn qorǵaýdy kúsheıtýge erekshe kóńil bólýi jáne QR Premer-Mınıstriniń oǵan tikeleı qatysýy - ınvestorlar úshin óte jaqsy belgi», - dedi Amerıka saýda palatasynyń Atqarýshy dırektory D. Bredbıýrı.

Investıtsııalyq yntymaqtastyq áleýetin atap óte otyryp, dıplomatııalyq mıssııalardyń basshylary Qazaqstanda júrgizilip jatqan ınvestıtsııalyq ahýaldy jaqsartý jónindegi jumystardy qoldaıtyndaryn jáne tyǵyz yntymaqtastyqty odan ári jalǵastyrýǵa múddeli ekenderin bildirdi. Olardyń pikirinshe, ınvestıtsııalyq jobalardy iske asyrýmen baılanysty barlyq máselelerdi QR Premer-Mınıstriniń tóraǵalyǵymen Úılestirý keńesi deńgeıinde tikeleı ári erkin talqylaý múmkindigi - ınvestorlar tarapynan senimniń artýynyń mańyzdy faktory.

Óz kezeginde QR Premer-Mınıstriniń birinshi orynbasary - Qarjy mınıstri Á. Smaıylov, «Astana» halyqaralyq qarjy ortalyǵynyń basqarýshysy Q. Kelimbetov sheteldik ınvestıtsııalardy belsendi túrde tartýdyń jańa tásilderine toqtalyp ótti. Investorlarmen belsendi jumys júrgizýdiń aımaqtyq habyna aınalatyn AHQO sátti jumys istep tur. Onyń aýmaǵynda qolaıly jumys isteýge jáne ınvestıtsııalyq jobalardy iske asyrýǵa barlyq qajetti jaǵdaılar jasalǵan. Bul aǵylshyn quqyǵy qaǵıdalaryna negizdelgen TMD keńistigindegi alǵashqy, biregeı quqyqtyq rejım, táýelsiz sot jáne arbıtraj ortalyǵy.

Kezdesýdi qorytyndylaı kele, QR Premer-Mınıstri A. Mamın ınvestıtsııalyq ahýaldy odan ári jaqsartyp, sheteldik ınvestorlarǵa jáne Qazaqstanda bıznes júrgizýge qolaıly jaǵdaılar jasaýǵa barlyq kúsh-jigerdiń jumyldyrylatynyn aıtty.

«Biz ózara is-qımylymyzdy jandandyrýǵa múddelimiz. Investıtsııalar tartý jónindegi jańa kúsheıtilgen sharalar ınvestıtsııalyq yntymaqtastyqqa eleýli qarqyn bererine senemiz», - dedi ol.