QR Úkimeti otyrysynda AÓK sýbsıdııalaý júıesin jetildirý máseleleri talqylandy
«Qazaqstanda gektarǵa sýbsıdııalar 2000-jyldardyń basynda paıda boldy. Ol ýaqytta olar logıkalyq negizge ıe bolatyn, sebebi ol kezde sala aınalym qarajatynyń jetispeýshiligine baılanysty úlken qıyndyqtarǵa tap bolǵan edi. Osy sýbsıdııalar esebinen sharýalar eń qajetti jumystardy júzege asyrdy», - dedi A.Mamytbekov.
Ol búginde AÓK-niń ekonomıkalyq tartymdy sala aınalǵanyn aıtyp ótti. Agrarlyq sektordaǵy negizgi kapıtalǵa ınvestıtsııalar ósiminiń qarqyny ekonomıkanyń basqa salalarynan basym tústi.
Oǵan qosa, aýyl sharýashylyǵynda tehnologııalylyqtyń tómendigine, salany mehanızmdeý deńgeıiniń álsizdigine, nátıjesinde tómen ónimdilik pen túsimdilikke baılanysty birqatar máseleler bar. Osyǵan baılanysty agroónerkásiptik keshen jetkilikti rentabeldilik pen tabystylyq máselelerin sheshe almaıdy, dep esepteıdi AShM basshysy.
A.Mamytbekovtiń pikirinshe, arzan tehnıka lızınginiń bolmaýynan fermerler gektarlyq sýbsıdııalar arqyly tapqandaryna qaraǵanda kóp shyǵynǵa ushyraıdy. Mysalǵa, bıdaı jınaýdy keshiktirýdiń ár 10 kúni astyqtyń 10% shyǵynyna alyp keledi. «Sondyqtan, ósimdik sharýashylyǵyndaǵy gektarlyq sýbsıdııalardy 2016 jyldan bastap qysqartyp, olardy tehnıka alýǵa paıyzdyq mólsherleme men lızıngti sýbsıdııalaýǵa, ınvestıtsııalyq sýbsıdııalarǵa baǵyttaý usynylady. Biz shyǵyndardyń 30% jýyǵyn qarjylandyra alamyz», - dep basa aıtty mınıstr.
Sondaı-aq, bosatylǵan qarajatty bilimderdi taratý júıesin, fıtosanıtarlyq qyzmetti kúsheıtýge jáne AÓK qoldaýdyń jalpy sharalaryna jatatyn birqatar basqa da shyǵyndardy qarjylandyrýǵa baǵyttaý usynylǵan.
Sonymen qatar, tyńaıtqyshtar, gerbıtsıdter, tuqymdar alýǵa sýbsıdııalardy tıimdi dep saqtaý usynylǵan. Mal sharýashylyǵyndaǵy ónimdilikti qoldaýǵa sýbsıdııalardy máseleni 2016 jyly talqylaýmen tek 2017 jyly qaıta qaraý usynylýda. Jalpy alǵanda qaıta bólý somasy shamamen 100 mlrd. teńgeni quraıdy. Usynylǵan sharalar oblys ákimderiniń, bıznes, Atameken UKP ókilderiniń qatysýymen talqylanyp, kelisildi, dep sendirdi A.Mamytbekov.
Budan ózge, mınıstr ú.j. astyq jınaý barysy týraly málimdedi. Osylaısha, 5 qazanǵa málimet boıynsha 13,2 mln. ga nemese jınalýy tıis astyq daqyldary alańynyń 89,6% jınaldy. 12,5 ts/ga ortasha túsimdilikpen 16,6 mln. tonna astyq bastyryldy, bul ótken jyldyń deńgeıinen 0,7 ts joǵary.
«Kúrishtiń rekordtyq túsimi Qyzylorda oblysynda alyndy. Bir gektardan 50,5 ts jınaldy. Kúrishtiń jalpy túsimi 423 myń tonnany qurady», - dep atap ótti A.Mamytbekov. «Nurly Jol» memlekettik baǵdarlamasyn júzege asyrý barysy týraly QR ulttyq ekonomıka mınıstri Erbolat Dosaev málimdedi.
Mınıstrdiń málimetinshe, aǵymdaǵy jyly Ulttyq qor qarajatynan baǵdarlamaǵa 796 mlrd. teńge qarastyrylǵan.
Oǵan qosa, ú.j. tamyzynda 2015 jyly «Nurly Jol» Memlekettik baǵdarlamasyn júzege asyrýǵa bólingen qarajatty ekonomıka ósimine kóp paıda ákeletin baǵyttarǵa qaıta bólý sheshimi qabyldandy. Bul «Ortalyq-Ońtústik», «Ortalyq-Shyǵys», «Ortalyq-Batys» basty avtojoldar jobalaryn júzege asyrý, eksportty, otandyq avtoónerkásipti jáne ShOB-ti qoldaýdy kúsheıtý. «2015-2017 jyldarǵa arnalǵan respýblıkalyq bıýdjetti qajetti naqtylaýdy ótkizgen soń qaıta bólýdi eskere otyryp, 2015 jyly Ulttyq qor esebinen Memlekettik baǵdarlamany qarjylandyrý 777,3 mlrd. teńgeni quraıdy. Búgingi tańda bólingen qarajattan shamamen 436,4 mlrd. teńge nemese 54,8% ıgerilgen», - dep habarlady Ulttyq ekonomıka basshysy.
Memlekettik baǵdarlamany júzege asyrý jáne bólingen qarajatty óz baǵyttary boıynsha paıdalaný barysy týraly tolyǵyraq IDM, EM, AShM, BǴM, «Samuryq-Qazyna» UÁQ» AQ jáne «Báıterek» UBH» AQ basshylary baıandady.