QR Úkimeti men EQQDB arasynda QR densaýlyq saqtaý ınfraqurylymyn jańǵyrtý kelisimi jasaldy

LONDON. QazAqparat - QR Premer-Mınıstri Asqar Mamın jáne Eýropalyq qaıta qurý jáne damý bankiniń (EQQDB) prezıdenti Sýma Chakrabartı QR densaýlyq saqtaý ınfraqurylymyn jańǵyrtý týraly qujatqa qol qoıdy. QazAqparat bul týraly primeminister.kz saıtyna silteme jasap habarlaıdy.

Asqar Mamın London qalasyna jumys sapary aıasynda EQQDB prezıdenti Sýma Chakrabartımen kezdesý ótkizdi.

«Qazaqstannnyń Tuńǵysh Prezıdenti – Elbasy Nursultan Nazarbaev pen Memleket basshysy Qasym-Jomart Toqaev EQQDB-men yntymaqtastyqqa zor kóńil bóledi. Ótken 27 jylda EQQDB-nyń Qazaqstanǵa ınvestıtsııalar kólemi 260-tan astam jobada 9 mlrd dollardan asty», - dedi QR Premeri.

Kelissóz qorytyndysy boıynsha QR Úkimeti men EQQDB arasynda Qazaqstanda densaýlyq saqtaý ınfraqurylymyn jańǵyrtýdyń Keshendi baǵdarlamasyn iske asyrý jónindegi Ózara túsinistik týraly memorandýmǵa qol qoıyldy.

«Qazaqstanda 2020–2024 jyldarǵa arnalǵan densaýlyq saqtaýdyń memlekettik baǵdarlamasy aıasynda jańa kópsalaly aýrýhanalar salynady. Biz EQQDB-nyń densaýlyq saqtaý júıesiniń ınfraqurylymyn jańǵyrtýǵa qatysýyn qoldaımyz», - dedi A. Mamın.

Óz tarapynan, EQQDB prezıdenti Sýma Chakrabartı QR densaýlyq saqtaý ınfraqurylymyn jańǵyrtý jobalaryn qarjylandyrýǵa qyzyǵýshylyq bildirdi.

Úkimet basshysy EQQDB-nyń Qazaqstandaǵy memlekettik-jekeshelik áriptestik salasyndaǵy iri jobany - Úlken Almaty avtomobıl aınalma jolyn (ÚAAAJ) iske asyrýǵa qatysýynyń mańyzdylyǵyn atap ótti.

Taraptar Qazaqstanda turǵyn úı-kommýnaldyq sharýashylyǵy, kólik ınfraqurylymy, jańartylatyn energııa kózderi jáne taǵy basqa salalarda memlekettik-jekeshelik áriptestik jobalaryn iske asyrý boıynsha ekijaqty yntymaqtastyq perspektıvalaryn talqylady.