QR Úkimeti agroónerkásip salasyn damytýdyń Ulttyq josparyn ázirleıdi

NUR-SULTAN. QazAqparat – Qazaqstanda aldaǵy bes jylda agroónerkásip salasyn damytýǵa arnalǵan Ulttyq jospar daıyndalady, dep habarlaıdy QazAqparat tilshisi.

«El Prezıdenti Úkimetke agroónerkásip salasyn damytý boıynsha tapsyrmalardy júktedi. Ol mindetterdi aldaǵy bes jylǵa arnalǵan Ulttyq jospar arqyly oryndaý kózdelgen. Qazirdiń ózinde salalyq qaýymdastyqtardyń ókilderi, halyqaralyq sarapshylar, «Atameken» palatasy men bıznes salasynyń, agroǵylymnyń ókilderi kirgen jumys toby quryldy. Jumys toby jer resýrstary men qarjylandyrýdyń qoljetimdiligin arttyrý, agroǵylymdy damytý, veterınarlyq jáne fıtosanıtarııalyq qaýipsizdik, sondaı-aq shıkizattyń ǵana emes, ony óńdeý esebinen eksportty arttyrý máseleleri boıynsha usynystardy ázirleıdi», - dedi Premer orynbasary Roman Sklıar Úkimettiń baspasóz ortalyǵynda jýrnalısterge.

Onyń aıtýynsha, óńdeý salasyndaǵy kásiporyndardyń qýattylyǵyn arttyrý úshin memlekettiń qosymsha qoldaý sharalarynyń kómegimen etti, jemis-jıdek, kókónis, qant, bıdaı, maı, balyq ónimderin óndirý men óńdeý boıynsha eksojúıeler qurylady.

Eske sala ketsek, osydan bir apta buryn Qazaqstan halqyna Joldaýyn jarııa etken QR Prezıdenti Qasym-Jomart Toqaev Úkimet aýyl sharýashylyǵy jerlerin tolyqqandy ekonomıkalyq aınalymǵa engizýdiń ózge ádis-tásilderin ázirleýi kerektigin málim etken bolatyn.