QR UEM: Jyl sońyna deıin azyq-túlik taýarlaryna baǵa aıtarlyqtaı óspeıdi

ASTANA. QazAqparat - QR Ulttyq ekonomıka mınıstrligi 2016 jyldyń sońyna deıin áleýmettik mańyzy bar taýarlarǵa baǵa eleýli deńgeıde óspeıtinin alǵa tartýda. Bul týraly «QazAqparat» agenttiginiń resmı saýalyna osy vedomstvodan habarlandy.

Atap aıtqanda, mınıstrlik naryqtar teńgerimine taldaý júrgizip, sonyń nátıjesinde ishki naryqta áleýmettik mańyzdy azyq-túlik taýarlary baǵasynyń ósimine yqpal etetin birqatar sebepter anyqtalǵan.

Osy rette álemdik naryqtardaǵy baǵa konıýktýrasynyń ózgerýi men valıýta baǵamy, tabıǵı monopolııa qyzmetterine tarıfterdiń joǵarylaýy eskerilip otyr. Bul turǵyda elektr energııasyna 7,9 paıyzǵa jáne janar-jaǵarmaıǵa 15,6 paıyz deńgeıindegi ósim azyq-túlik taýarlarynyń qymbattaýyna áser etti.

Budan bólek, taýarlar baǵasyna maýsymdyq aýytqýlar yqpalyn tıgizýde. Jyl saıyn qoımalarda taýarlardyń keıbir túrlerine qor azaıǵan kezde baǵanyń kúrt ózgerýi baıqalady. Osy oraıda taýar quny ásirese sáýir-tamyzda joǵary bolady.

Sonymen qatar eksporttyq jetkizilimderdiń áseri de baǵanyń qalyptasýyna túzetýler engizedi. Eýrazııalyq ekonomıkalyq odaqtyń jumys isteýin jáne kedendik shekaralardyń ashyqtyǵyn, onyń ishinde Reseı men Qyrǵyzstandy eskere otyryp, shekaraǵa shektes naryqtarda baǵanyń joǵarylýy kezinde taýarlardyń jylystaýy oryn alady. Bul óz kezeginde ishki naryqta taýar qunynyń ósimine alyp keledi.

«Búginde joǵaryda atalǵan faktorlar baǵanyń ósimine óziniń yqpalyn tıigizip úlgerdi jáne jyl sońyna deıin aıtarlyqtaı baǵa ósimi boljanyp otyrǵan joq»,-dep atap ótilgen mınıstrlik málimetinde.

Belgili bolǵandaı, 2016 jylǵy 20 qyrkúıektegi jaǵdaı boıynsha aǵymdaǵy jyldyń basynan beri áleýmettik-mańyzdy azyq-túlik taýarlaryna baǵalar ındeksi 108,1 paıyzdy qurady