QR UEM ónerkásipti jigerlendirý maqsatynda birqatar salyqtyq jeńildik engizbek
Bul jaıly Senatta ótken «Salyq saıasaty men salyqtyq ákimshilikti jetildirýdiń kontseptýaldyq máseleleri» taqyrybyndaǵy dóńgelek ústelde QR UEM Salyq jáne keden saıasaty departamentiniń dırektory Azamat Ámrın málim etti, dep habarlaıdy QazAqparat tilshisi.
«Zań jobasy sheńberinde kásiporyndardy óndiristi ulǵaıtýǵa yntalandyrý boıynsha mynadaı sharalar kózdelgen: ınvestıtsııalyq salyq nesıesin engizý, jeńil jáne tamaq ónerkásibi úshin ınvestıtsııalar boıynsha shegin 2 ese tómendetý, bir arnaıy ekonomıkalyq aımaqtyń qatysýshylary arasynda óndiriletin taýarlardy ótkizý boıynsha aınalymdardy qosylǵan qun salyǵynan (QQS) bosatý, kólik quraldary men aýyl sharýashylyǵy tehnıkasynyń qurambólikterin óndirý úshin jeńildikti salyq salýdy taratý, maqtany qaıta óńdeýge, qant, kondıterlik buıymdar, ashytqy óndirýge eseptelgen QQS somasyn 70 paıyzǵa azaıtý», - dedi Azamat Ámrın.
Departament dırektorynyń aıtýyna qaraǵanda, bul sharalar kásiporyndarǵa tabystyń bir bóligin saqtap, qyzmetkerlerdiń sanyn arttyrýǵa, olardyń jalaqysyn arttyryp, óndiristi materıaldyq-tehnıkalyq qaıta jaraqtandyrýǵa, jańa jabdyqtar men tehnologııalardy engizýge múmkindik beredi. Óndiristiń ulǵaıýy tutastaı alǵanda eksporttyq áleýetke oń áser etedi.
«Jasandy ıntellektti damytý jáne keń jolaqty ınternetpen qamtý óndiristi avtomattandyrýdy yntalandyrady. Osylaısha eńbek ónimdiliginiń ósimi qamtamasyz etiledi. Osyǵan baılanysty 5G baılanystyń jańa túrin qurýǵa ınvestıtsııalar tartý maqsatynda telekommýnıkatsııa salasy úshin júktemeni tómendetý usynylady», - dedi ol.