QR UEM mınıstri Qazaqstannyń aldaǵy 5 jyldaǵy damý boljamyn jarııa etti

ASTANA. QazAqparat - Búgin QR Premer-mınıstri Baqytjan Saǵyntaevtyń qatysýymen Úkimet otyrysy ótip jatyr. Otyrysta QR 2018-2022 jyldardaǵy áleýmettik ekonomıkalyq damý boljamy men «QR 2018-2020 jyldarǵa arnalǵan respýblıkalyq bıýdjeti týraly» zań jobasy qaralýda, dep habarlaıdy «QazAqparat» HAA tilshisi.

QR Ulttyq ekonomıka mınıstri Tımýr Súleımenovtiń baıandaýynsha, boljam birneshe faktorlar boıynsha jasalǵan. Atap aıtqanda, osy jyldyń basynan bastap el ekonomıkasynyń belsendiliginiń artqany baıqalady.

Sońǵy 7 aıda jalpy ishki ónimniń ósimi 4,0% -dy qurap, 2017 jyldyń sońyna deıin ekonomıkanyń 3,4% deńgeıinde ósimi kútilip otyr. Ekinshiden, álemdik ekonomıka ósiminiń jańartylǵan boljamdary boıynsha, 2017-2018 jyldary damyǵan elderde ekonomıkalyq ósim 3.5-3.6% deńgeıinde bolady dep kútilýde. Sonymen birge, álemdik taýar naryqtaryndaǵy ahýal jaqsaryp keledi. Máselen, aǵymdaǵy jyldyń 7 aıy ishinde munaı baǵasy barreline 51,7 dollardy quraǵan (2016 jyly - 44,0 dollar). 2017 jylǵa arnalǵan boljaǵa sáıkes (MSU derekteri boıynsha ortasha baǵa) munaı baǵasy 53,5 dollar, 2018 jyly - 55,3 AQSh dollary deńgeıinde bolady dep boljanýda.

«Osyǵan baılanysty ishki jáne syrtqy parametrlerdiń ózgerýine qaraı Qazaqstan ekonomıkasyn damytýdyń yqtımal 3 stsenarııi qarastyrylady. Optımıstik stsenarıı boıynsha 2018-2022 jyldary munaı baǵasy barreline 55 dollar bolady. Pessımıstik stsenarıı boıynsha, munaı baǵasy $ 35 deıin tómendeıdi. Biz 2018-2022 jyldarǵa arnalǵan Áleýmettik-ekonomıkalyq damý boljamyn jáne 2018-2020 jyldarǵa arnalǵan bıýdjet parametrlerin qalyptastyrýǵa negiz retinde munaı baǵasyn barreline 45 dollar bolady degen bazalyq stsenarıı ázirledik», - deıdi mınıstr.

Onyń aıtýynsha, Qazaqstanda 2018 jyly ІJÓ-niń naqty ósimi 3,1% deńgeıinde bolyp, 2022 jyly 4,2% -ǵa ósýi kerek. Aldaǵy besjyldyqta JІÓ ortasha jyldyq ósim qarqyny 3,7% quraıdy. Sondaı-aq, nomınaldy JІÓ 2018 jyly 55 906 200 000 000 teńgeden 2022 jyly 75 875,4 mlrd teńgege deıin ulǵaıady. JІÓ jan basyna shaqqanda jylyna 2018 jyly 9 myń AQSh dollaryn qurasa, 2022 jyly 11,7 AQSh dollaryna ulǵaıady. Buǵan qosa birqatar baǵdarlamalar boıynsha aýyl sharýashylyǵy - 5,7%, qurylys ındýstrııasy - 4,0%, kólik - 5,1%, sondaı-aq saýda - 3,5% ulǵaıýy yqtımal.

Munaı óndirý kólemi 2018 jyly 86 mln tonnadan, 2022 jyly 88,6 mln. tonnaǵa artady. Jumyssyzdyq deńgeıi 2018 jyly 4,9% -dan 2022 jyly 4,7% -ǵa deıin tómendeıdi. 2018 jyly eksport kólemi $ 47,5 mlrd qurasa, 2022 jyly 60,6 mlrd. dollarǵa deıin ósse, ımport kólemi 2018 jyly 34,0 mlrd dollardan 2022 jylǵa qaraı 45,5 mlrd dollarǵa artpaq.