QR UEM mınıstri bolashaq jaıly oı tolǵaý baıqaýy jeńimpazdaryn marapattady

 ASTANA. QazAqparat - Búgin QR Ulttyq ekonomıka mınıstri Tımýr Súleımenov elimizdegi bilim berý mektepteriniń 5-9 synyp oqýshylary arasynda ótkizilgen «Men jáne meniń Qazaqstanym 2025 jyly» atty respýblıkalyq baıqaýdyń jeńimpazdaryn marapattady, dep habarlaıdy «QazAqparat» HAA tilshisi.

Baıqaý QR Ulttyq ekonomıka men Bilim jáne ǵylym mınıstrliginiń qoldaýymen uıymdastyrylǵan. Oǵan qatysý úshin balalar 2025 jyly Qazaqstandy qalaı elestetini týraly oı tolǵaý jazýǵa mindettelgen. Baıqaýǵa Qazaqstannyń barlyq aımaqtarynan qazaq, aǵylshyn jáne orys tilderinde 100-den asa oı tolǵaý (esse) kelip, olardyń ishinen eń úzdik 27 shyǵarma tańdalyp alynǵan. Júldege ıe bolǵan 10 oqýshyǵa QR Ulttyq ekonomıka mınıstri Tımýr Súleımenov alǵys hat pen «EKSPO-2017» halyqaralyq kórmesiniń bıletin tabys etti. Al aqtyq saıysqa shyqqan 17 oqýshy estelik maqtaý qaǵazdaryna ıelendi.
 

«Qazaqstannyń bolashaǵy sendersińder. Eshkim kelip bizdiń elimizdi kórkeıtip bermeıdi. Qazaqstannyń bolashaǵyn jas urpaqtyń kózimen kórý aǵa býynǵa mańyzdy edi. Osy sebepti baıqaýdy ótkizý týraly ıdeıa týdy. Shet qalmaı, belsendilik tanytqan barlyqtaryńyzǵa kóp rahmet!» - dep quttyqtady Ulttyq ekonomıka mınıstri Tımýr Súleımenov.

Mınıstrdiń qolynan Almatydan kelgen Álı Hasen, Gúlnaz Moldash, Astanadan Dana Ospanova men Ádııa Babajanova, Qyzylorda oblysynan Arýjan Qonysbekova, Óskemennen Zere Maratova, Pavlodardan Sofııa Nurekenova alǵys hattarǵa ıe bolyp, «EKSPO-2017» halyqaralyq kórmesin tamashalaýǵa múmkindik aldy.
 

«Baıqaý bolatynyn estigen kezde birneshe kún boıy oıymdy júıelep júrdim. Odan keıin oı tolǵaýymdy qaǵazǵa túsirip kórgenimde muǵalimime qatty unady. «EKSPO-2017» kórmesin tamashalaýǵa múmkindik alǵanyma qýanyshtymyn», - deıdi Óskemennen kelgen Jambyl gımnazııasynyń oqýshysy Zere Maratova.  

Tımýr Súleımenovtiń aıtýynsha, shyǵarmalarda kezdesken qyzyqty ári mańyzdy oı tolǵaýlar Qazaqstannyń 2025 jylǵy Strategııalyq damý josparyna engizilmek. Sonymen qatar, mınıstr qazirgi ýaqytta atalǵan qujatty saraptama jáne bıznes-birlestikterdiń ókilderi zerttep jatqanyn jetkizdi.

Mektep oqýshylarynyń baıqaýy aımaqtyq jáne respýblıkalyq kezeńderge bólingen. Ekinshi kezeńnen súrinbeı ótken oı tolǵaýlardy arnaıy komıssııa logıka jáne talqylaýdyń aýqymy, baǵanyń naqtylyǵy men sheshimi, ıdeıanyń biregeıligi men bere bilýi syndy talaptar boıynsha baǵalady. Aqtyq saıysqa shyqqandar tarıhı oqıǵalar men jeke dúnıetanymyna súıene otyryp, eldiń damýyna qatysty oı pikirlerimen erekshelendi.