QR UEM: Qazaqstandyqtardyń ortasha tabysy - 80 156 teńge

ASTANA. QazAqparat - 2017 jyldyń ekinshi toqsanyndaǵy kórsetkish boıynsha, qazaqstandyqtardyń orta eseppen jan basyna shaqqandaǵy ataýly aqshalaı tabysy 80 156 teńgeni qurady, dep habarlaıdy «QazAqparat» HAA tilshisi QR Ulttyq ekonomıka mınıstrligine silteme jasap.

Mınıstrliktiń aqparatyna sáıkes, atalǵan kórsetkish 2016 jylmen salystyrǵanda 5,2 paıyzǵa ósken. Osy kezeńde tutyný taýarlary men kórsetiletin qyzmetterdiń baǵasy 7,5 paıyzǵa ósip, halyqtyń naqty aqshalaı tabystary 2,1 paıyzǵa tómendegen.

«Atalǵan merzimde ataýly aqshalaı tabystardyń mólsheri boıynsha joǵary kórsetkish Atyraý oblysynda baıqaldy. Ol óńirdegi kórsetkish respýblıkalyq deńgeıden 1,7 esege artyp otyr. Tabysy eń tómen óńirler - Ońtústik Qazaqstan jáne Jambyl oblystary. Eki oblysta halyqtyń tabys mólsheri ortasha respýblıkalyq deńgeıdiń 57-66 paıyzyn quraıdy», - dep habarlady vedomstvodan.

Óńirler boıynsha halyqtyń orta eseppen jan basyna shaqqandaǵy ataýly aqshalaı tabystarynyń eń joǵary jáne eń tómengi mólsheri arasyndaǵy aıyrmashylyq 3 eseni quraǵan.