QR UEM-de jeltoqsannan bastap artyq jumys úshin aqy tólene bastaıdy
«Bizdiń kadrlyq qyzmet sońǵy aılarda artyq jumystyń paıda bolý sebebin anyqtaýǵa tyrysty. Eń qyzyǵy, jumys kúni 100 paıyz aıaqtalǵan ýaqytta, ıaǵnı 18:30 kezinde aıtarlyqtaı qarsylyqty qyzmetkerlerdiń ózinen kórdik. Bizde qyzmetkerlerdiń 10 paıyzy saǵat 20:00 kezinde jattyǵýǵa barýy nemese balany alyp ketýi kerektigin aıtady. Demek, saǵat 18:30-da jumystan shyǵyp ketýdi ózderi qalamaıdy», - deıdi QR UEM adam resýrstaryn damytý boıynsha departament dırektory Rýslan Turǵanaly.
Onyń aıtýyna qaraǵanda, vedomstvoda jumystan tys ýaqytta sebepsiz qalý jaǵdaılaryna baılanysty qyzmetkerler túsinik jaza bastaǵan. Sonymen birge, anyqtalǵanyndaı, keıbir departamentterdiń jumysynyń ózi jumystan tys ýaqytta qalýdy talap etetini belgili bolyp shyqqan.
«Biz qyzmetkerlerdi kólikpen tasymaldaý kestesin ózgerttik. Ekinshiden, halyqaralyq uıymdarmen tikeleı jumys isteıtin keńsege jáne birneshe departamentke, Premer-Mınıstr Keńsesimen jumys atqaratyn jobalyq basqarmaǵa keı jaǵdaıda hattar keshke túsip jatatyny anyqtaldy», - deıdi ol.
Endigide, mınıstrliktegi mundaı qyzmetkerlerge artyq jumys úshin aqy tólenetini ýáde etilýde. Alaıda, keı jaǵdaıda eshqandaı sebepsiz jumystan shyqpaı otyratyn qyzmetkerlerdiń de bary belgili bolǵan.
«Biz qarjygerlermen sóılestik. Meniń oıymsha, jeltoqsan aıynan bastap jumys ýaqytynan tys eńbek etetin qyzmetkerlerge qosymsha aqy tólenedi. Qazirgi tańda kadrlyq qyzmetkerler belgili bir qyzmetkerdiń nelikten 18:30-dan keıin jumystan otyratynyn anyqtap jatyr. Tipti, bul suraqtar departamenttiń basshylaryna da qoıylýda», - deıdi R.Turǵanaly.
Eske sala ketsek, budan buryn QR Memlekettik qyzmet isteri jáne sybaılas jemqorlyqqa qarsy is-qımyl agenttigi memlekettik qyzmet salasyn baqylaý departamentiniń dırektory Ravıl Tólebaev memlekettik organdarda qyzmetkerlerge jumys ýaqytynan tys artyq jumys istetý máselesimen kúres qalaı júrgizilip jatqanyn aıtqan bolatyn. Onyń sózine sensek, mınıstrlikterde kompıýterlerdi avtomatty túrde óshirý tártibi ornatylǵanymen, bul shara aıtarlyqtaı kómektespeı jatqan kórinedi.