QR UEM bazalyq mólsherlemeni aqsha-kredıt saıasatynyń negizgi quraly retinde usyndy

NUR-SULTAN. QazAqparat - Qazaqstanda qaıta qarjylandyrý mólsherlemesiniń ornyna bazalyq mólsherleme aqsha-kredıt saıasatynyń negizgi quraly retinde usynylady. Bul týraly búgin Májilistiń jalpy QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

Mınıstrdiń atap ótýinshe, mundaı shara «QR-nyń keıbir zańnamalyq aktilerine ekonomıkalyq ósýdi qalpyna keltirý máseleleri boıynsha ózgerister men tolyqtyrýlar engizý týraly» zań jobasynda kózdelgen.

«Aqsha-kredıt saıasatyn jetildirýge baǵyttalǵan birqatar túzetýler kózdeledi. Zańnama normalaryn birizdendirý úshin qaıta qarjylandyrý mólsherlemesiniń ornyna bazalyq mólsherleme aqsha-kredıt saıasatynyń negizgi quraly retinde usynylady. Qarjy naryǵynyń turaqtylyǵy boıynsha sındıkattalǵan qaryz berý tetigin jetildirýge baǵyttalǵan túzetýler kózdeledi»,- dedi ol.

Mınıstrdiń aıtýynsha, bul birneshe banktiń, halyqaralyq qarjy uıymdarynyń bir shart aıasynda qaryz alýshynyń kredıttenýine múmkindik beredi.

«Beırezıdent bankterdiń, saqtandyrý (qaıta saqtandyrý) uıymdarynyń fılıaldary úshin eldiń qarjy uıymdaryna uqsas talaptardy aıqyndaý usynylady. Mıkroqarjy uıymdarynyń qyzmetin qarjy uıymdaryna teńestirý kózdeledi. Bul qarjy qyzmetteriniń adal básekelestigin qoldaýdy jáne tutynýshylardyń quqyqtaryn qorǵaýdy qamtamasyz etedi», - dedi Rýslan Dálenov.