QR UEM aýa baptaǵysh ornatýǵa engizilgen shekteýdiń kúshin joımaq
«Bul jaıynda qurylys erejelerinde kórgen bolasyzdar, ıaǵnı bıylǵy 1 naýryzdan bastap jańa qaǵıdalar kúshine endi. Bul talaptar nelikten qoıylǵanyna toqtalatyn bolsaq, qalalalardaǵy sáýlettik kóriktilikti, halyqtyń qaýipsizdigin joǵarylatý maqsatynda engizildi. Osy talaptar bir mezgilde budan buryn ornatylǵan salqyndatqyshtar men spýtnıktik antennalardy alyp tastaýdy qajet etpeıdi», - dedi QR UEM Qurylys, turǵyn úı-kommýnaldyq sharýashylyq ister jáne jer resýrstaryn basqarý komıtetiniń Sáýlet, qala qurylysy jáne qala qurylysy kadastry basqarmasynyń basshysy Sáýle Mustafaeva.
Bul qaǵıda jańadan salynatyn kóp qabatty úılerge qatysty ekenine toqtalǵan ol jaqyn arada bul erejege tıisti ózgertýler engizý qarastyrylyp otyrǵanyn jetkizdi.
«Qazirgi kezde bul talapty qaıta qaraıtyn bolamyz, sebebi turǵyndar tarapynan narazylyq pen usynystar engizip jatyr», - dedi basqarma basshysy.
Onyń sózine qaraǵanda, qarastyrylyp otyrǵan tıisti tolyqtyrý aıasynda atalǵan shekteýdiń kóp qabatty úılerge taralýyn alyp tastaý josparlanyp otyr.
«Osy qaǵıda aıasynda tarıhı-mádenı mańyzy bar nysandarǵa, ǵımarattyń sáýlettik elementterine atalǵan qurylǵylardy ornatýǵa shekteý saqtalatyn bolady», - dedi S. Mustafaeva.
Esterińizge sala keteıik, 2016 jyldyń 1 naýryzynan bastap qurylys salasynda qurylysty uıymdastyrý jáne ruqsatnamalyq rásimderden ótý erejeleri kúshine endi. Qujatqa sáıkes, shahardyń magıstraldy jáne tranzıttik kóshelerinde ornalasqan kóp qabatty turǵyn úılerdiń qasbetterinde aýa baptaǵyshtardy ornatýǵa ruqsat etilmeıdi.