QR TJM kúshteri tótenshe jaǵdaı kezinde órtten 30-dan astam adamdy qutqardy

NUR-SULTAN. QazAqparat – Tótenshe jaǵdaılar mınıstrliginiń kúshteri tótenshe jaǵdaı kezinde órtten 30-dan astam adamdy qutqaryp, 115 adamdy qaýipsiz jerge shyǵardy. Bul týraly atalǵan vedomstvodan málim etti, dep habarlaıdy QazAqparat tilshisi.

«Tótenshe jaǵdaılar mınıstrliginiń bólimsheleri tótenshe jaǵdaı jarııalanǵan kúnnen bastap ártúrli ákimshilik, onyń ishinde memlekettik menshik nysandarynda, sondaı-aq tirshilikti qamtamasyz etý nysandary men bıznes sýbektilerinde bolǵan 117 órtti sóndirdi (Almaty q. - 58, Shymkent q. - 14, Almaty obl. - 9, ShQO - 3, Jambyl obl. - 7, Qyzylorda obl. - 26). Bul rette TJM kúshteri órt sóndirý kezinde 30-dan astam adamdy qutqaryp, 115 adamdy evakýatsııalady», - delingen mınıstrlik aqparatynda.

Tótenshe jaǵdaılardy joıýǵa jeke quramnan 1 300-ge jýyq adam jáne 250 birlik tehnıka jumyldyryldy. Ózderiniń qyzmettik mindetterin oryndaý kezinde 10 qyzmetker zardap shekti. Onyń ishinde 1 qyzmetker oq jaraqatyn aldy. Jeke quram qyzmetkerlerine medıtsınalyq kómek kórsetilgennen keıin úılerine qaıtaryldy.

«Órt sóndirý kezinde jalpy 30 birlik órt sóndirý-qutqarý tehnıkasy qırady. Tártip buzýshylar 7-eýin aıdap áketip, onyń 5-eýin órtep jibergen. Taǵy 25-i qırady. Qazirgi ýaqytta 21 tehnıka qalpyna keltirildi, qalǵany iske jaramsyz bolyp qaldy», - dep atap ótedi vedomstvodan.