QR TJM Almatyda 16 qabatty úıde bolǵan órtke qatysty tolyq málimet usyndy
«1 tamyzda saǵat 17:10-da TJD kúshteri men quraldary joǵary dáreje boıynsha Alataý aýdany, Aqkent shaǵynaýdany, 54 mekenjaıyna jiberildi.
6 mınýttan keıin jetken soń, 1-den 16-shy qabatqa deıin 80 sharshy metr aýmaqta kabel shahtasynda elektr kabelderi ashyq jalynmen janyp jatqany anyqtaldy.
Raımbek dańǵylynda kólik keptelisi bolǵanyna jáne órt sóndirý tehnıkasynyń kirý joldary turaqta turǵan kóliktermen shektelgenine qaramastan, alǵashqy órt esepteri 6 mınýtta jetti.
Joǵary qabattarda jáne evakýatsııa joldarynda qoıý tútin men joǵary temperatýra qalyptasty. Turǵyndardyń densaýlyǵyna qaýip tóndi.
Túninniń qalyń bolýy órt sóndirýdi qıyndatty. Gaz-tútinnen qorǵaý qyzmetiniń (GTQQ) jumysy uıymdastyryldy, GTQQ mamandary 80 adamdy, onyń ishinde 35 adamdy qutqarý qalpaǵynyń kómegimen, qalǵan turǵyndardy arnaıy tehnıkanyń kómegimen qutqardy. Barlyǵy 200-den astam adam evakýatsııalandy.
Adamdardy evakýatsııalaý jáne qutqarý úshin 3 órt satysy, besikteri bar 2 avtokran,»aralas tásilmen«qol órt satysy (úshsatyly baspaldaq, shabýyl baspaldaǵy) ornalastyryldy
Qabyldanǵan sharalardyń nátıjesinde órt 18.46-da sóndirildi.
Oqıǵa ornynda: Tótenshe jaǵdaılar departamentiniń 50 qyzmetkeri men 14 tehnıkasy, Polıtsııa departamentiniń 40 qyzmetkeri men 11 tehnıkasy, qutqarý qyzmetiniń 12 qyzmetkeri men 6 tehnıkasy, jedel medıtsınalyq kómektiń 69 qyzmetkeri men 23 tehnıkasy jumyldyryldy», - delingen mınıstrlik málimetinde.
Eske sala keteıik, 1 tamyz kúni Almatyda 16 qabatty úı órtendi. Amaly qalmaǵan turǵyndar balalaryn terezeden laqtyrdy.
Qyzyl jalyn saǵat 18:46 kezinde sóndirildi.
Alǵashynda 31 adam, onyń ishinde 16 bala aýrýhanaǵa jetkizilgeni habarlanǵan bolatyn.
Zardap shekkenderdiń arasynda 2 júkti áıel bar.
Keıingi málimet boıynsha, oqıǵa saldarynan 1 adam mert bolyp, 43-i zardap shekti. Onyń ishinde 4 bala reanımatsııa bóliminde jatyr.
Alataý aýdanynyń ákimi Azamat Qaldybekovtiń tóraǵalyǵymen úı aldynda jedel shtab quryldy. Turǵyndar tamaq jáne jatyn orynmen qamtamasyz etildi.